Tramp jäne Kim Joñ Un. Foto: Daily Express.

AQŞ prezidenti Donal'd Tramp prezident bolıp saylanğannan bergi eñ wzaq äri salmaqtı saparına attandı. Bwl sapar 10 künge jalğasadı jäne Şığıs Aziyanıñ 5 elinde boladı. Degenmen, Tınıq mwhittıñ batıs jağalauındağı elderin tegis aralap şıqqalı otırsa da Soltüstik Koreyağa bara almaytını anıq. Alayda, Tramp sapar barısında barğan eldiñ bärinde de Soltüstik Koreyanıñ «jırın jırlaydı». YAğni, Soltüstik Koreya jahandıq yadrolıq derjava retinde qarastırıladı, al basqa da damığan elder osı ambiciyanı älsiretuge tırısıp keledi. Mine bwl osı retki Tramp saparında kez-kelgen ekijaqtı kelissözderge, ekonomikalıq talqılaularğa jäne kommerciyalıq şığarılımğa eñ bastı taqırıp – Soltüstik Koreya boladı.

«Washington Post» basılımınıñ habarında, Aq üy ökilderi bwl jolğı sapar Tramptıñ Qıtayğa degen közqarasın özgertuge jäne Aziya elderimen bolğan sauda tapşılığın barınşa azaytuğa oñ ıqpal jasaydı dep qaraytını aytılğan. Al «The Wall Street Journal» basılımı prezident keñesşileriniñ sözine silteme jasay otırıp, Tramptıñ bwl sapardağı bastı mindeti, saparlay barğan el ükimetteri men Soltüstik Koreya arasındağı qarım-qatınastı retteu. Sonımen birge Soltüstik Koreyanıñ yadrolıq arandatuşılığına qarsı küreske jwmıldıru. Bwl üşin Soltüstik Koreyağa bağıttalğan qısımdı arttıruğa köndiru ekenin habarladı.

Tramptıñ wlttıq qauipsizdik jönindegi keñesşisi H. R. MakMaster sözinde: «Prezidenttiñ saparınıñ üş negizgi maqsatı bar. Birinşiden, Soltüstik Koreyanı yadrolıq qarusızdandıruğa halıqaralıq küş-jigerdi nığaytu. Ekinşi, Tınıq mwhitı men Ündi mwhitı alabın erkin sauda alañına aylandıru. Üşinşi, ädiletti jäne özara tiimdi sauda jasauğa wmtılu», – degen.

Tramp saparına Soltüstik Koreyanıñ eñ joğarı basşısı Kim Joñ Un da qattı nazar audarıp otır. Sebebi, sapardıñ aldınğı böligi Kim Joñ Unğa jaqın üş elde – Japoniya, Oñtüstik Koreya, Qıtay elderinde boladı. Sapardıñ soñında Tramp V'etnam men Filippinge barıp, eki halıqaralıq sammitke qatısadı. Aldınğı üş el de AQŞ-tıñ iri sauda äriptesteri. Oğan qosa Soltüstik Koreyağa qarsı küres jasauda mañızı zor elder. Tramp bwl elderdegi saparı onıñ twtas Aziya elderindegi saparınıñ sätti bolu-bolmauımen tikeley baylanıstı. Soltüstik Koreyağa qarsı qısımdı arttırıp, tipti oğan küş qoldanudı alğa tartuı mümkin. Biraq Aziyanıñ jergilikti derjavaları bwl wsınıstı qabılday qoyuı ekitalay.

AQŞ-tıñ tanımal basılımdarında halıqaralıq sarapşılardıñ pikirine qaraytın bolsaq, bäri de bir auızdan: «Tramptıñ Aziyadağı alğaşqı resmi saparınıñ sätti-sätsiz boluı, kezdesu kezderinde ayırmaşılıqtar men qayşılıqtardı qalay retke saluında jäne onıñ aymaqtağı el basşılarımen bolğan jeke qarım-qatınasın qalay wtımdı paydalana biluinde. Ol bwl istiñ üdesinen şığa alsa, onda atalğan aymaqta amerikalıq sayasattıñ ükisin jelkildete aladı», – dep qaraydı.

Kim Joñ Un bwl saparğa aşıq kedergi keltirmegen künniñ özinde, nazardan tıs qaldırmaydı. Tipti, AQŞ-qa qaratqan közqarasına qarağanda orayı kelip jatsa, Tramp saparına astırtın kedergiler jasauı da bek mümkin. Al, eger aşıq qarsılıq bildirip, zımıran sınağı arqılı jauap qaytarsa, onda bwl KHDR üşin tiimsiz. Olay bolğanda kelissözder kezinde aziyalıq derjavalar da Soltüstik Koreyanıñ sözin söyley almaytın boladı.

“The Qazaq Times”