Foto: newstatesman.com

Wlıbritaniyanıñ Prem'er-ministri Tereza Mey  "Brexit" jobası jüzege asqannan keyin, eki jıl boyı Euroodaq pen London arasındağı sauda baylanıstarı odaqqa müşe kezdegi talaptar boyınşa jürgizilgenin qalaydı. Bwl turalı BBC aqparattıq qızmeti jazdı. 

Prem'er-ministrdiñ Italiyada ötken jiın barısında aytqan wsınısı tığırıqqa tirelgen Brexit talqılaularına jaña serpin beredi degen ümit bar. Tereza Mey eki jıl uaqıt aralığında Wlıbritaniya Euroodaqqa odaqtas memlekettermen qatar jarna töleytinin jäne özge Europa elderiniñ migranttarı arnayı tirkelu arqılı Wlıbritaniyadağı ömirin jalğastıra beretinin habarladı.

Euroodaqtıñ bastı kelissöz jürgizuşi twlğası Mişel' Barn'e Tereza Meydiñ wsınısın "konstruktivti, jinaqı oy" dep bağalap, Wlıbritaniya Prem'eriniñ alğa jıljuğa degen qwlşınısın jılı qabıldadı.

Tereza Mey, sonday-aq, Wlıbritaniya Euroodaqtan şıqqannan keyin de tığız dostıq baylanıstar men sauda äriptestigi jalğasa beretinine senim bildirip, ol üşin jaña kelisim dayındaudı wsındı. Prem'er hanım 2019 jıldıñ naurızında Brexit is jüzinde orındalğannan keyin, Wlıbritaniyanıñ eki jıl boyı töleuge tiisti qarjısın naqtı atamağanımen, BBC Londonnıñ bereşegin 20 mlrd euroğa bağalaydı.

Tereza Mey atalğan eki jıl işinde barlıq sauda aynalımınıñ osığan deyingi şarttar negizinde qosımşa tariftersiz jürgenin qalaydı jäne keden qauipsizdigi siyaqtı mäselelerde Wlıbritaniya şeşim qabıldau isine aralasuın jalğastırğanın orındı köredi. "Biraq bwl uaqıt eki jıldan artıq wzartılmauı kerek. Öytkeni britandıqtar da, özge europalıqtar da Wlıbritaniyanıñ Euroodaqta onan äri qalğanın qalamaydı",  - Tereza Mey.

“The Qazaq Times”