Erdrğan BWW jinalısında. Foto: New Eastern Outlook.

Türik basşısı Rejep Tayıp Erdoğan Iraktağı Kürd Avtonomiyasınıñ täuelsizdik alu referendumına qarsılığın BWW Bas Assambleyasınıñ jinalısında, älem basşıları arasında da aytıp ötti. Ol "bwl qadam öñirdegi jaña qaqtığıstardıñ bar ekenin bildiredi" dep eskertti. Bwl turalı sol eldiñ «Türik Tele-Radio» qızmetiniñ resmi saytı jazdı.

Türik basşısı BWW-niñ kezekti jinalısında kürd jasaqtarınan qwralğan PKK bölşekteuşi terrorlıq wyımnıñ Süriya jerinde de küş alıp kele jatqanın, ondağı halıqtardıñ demografiyasına josparlı türde özgertuler jasap jatqanın aytıp ötti. Erdoğan sözinde: «Eger biz DAIŞ-ke qarsı küresti jüyeli türde jürgizbesek, onda ekinşi bir DAIŞ payda boladı», - dedi.

Türkiya prezidenti körşiles Süriya elindegi soğıs jağdayın da söz etti. «Altı jıldan beri soğıs qasiretin körgen Süriya halqın, bükil älem jalğız qaldırsa da Türkiya öziniñ sayasi jäne gumanitarlıq kömeginen bas tartpaydı. Qazir Türkiyanı 3 mln süriyalıq jäne 200 mıñ irak azamatı panalap otır. Olarğa 30 mlrd AQŞ dolları köleminde kömek körsetildi. Alayda, Europa Odağı öziniñ uäde etken gumanitarlıq kömegin äli de jetkizip bermedi», – dedi ol.

Sonday-aq, Erdoğan Katar dağdarısına ara ağayındıqtı jalğastıratının atap ötti. Jinalısta M'yanma mwsılmandarına jasalğan qırğındı da tilge tiek etip, Halıqaralıq qauımdastıqtıñ bwl mäselede jauapkerşilik tanıtpay qalğanın da sınğa aldı. Söziniñ soñında ol aymaqtarda bolıp jatqan qaqtığıstarğa qarata: «Közimizdiñ reñi är türli bolğanımen, odan aqqan jasımızdıñ reñi birdey», – dedi.

“The Qazaq Times”