Soñğı uaqıtta bwqaralıq aqparat qwraldarı betterinde Qıtaydağı qazaqtardıñ qudalanıp, qısım körip jatqanı jayında jii-jii jazılıp, aytılıp jür. Tipti biıl Astanada ötken Düniejüzi qazaqtarı qwrıltayında da osı mäsele köterildi. Qıtay qazaqtarınıñ qısım körip jatqandığın Germaniyadan kelgen Ömirhan Altın elbası Nwrswltan Nazarbaevqa jetkizdi.  Prezident bwl jayında birinşi ret estip twrğanın aytıp, aldağı uaqıtta bwl mäseleni şeşu üşin tiisti orındarğa tapsırma beretindiginde mälimdegen edi. Bwl äñgimeniñ aytılğanına da 20 kün ötti. Biraq bilik tarapınan sausağın qimıldatqan tiri jan joq. Barlığı ünsiz, barlığında da öli tınıştıq.

Osı uaqıt aralığında Qıtayda 200 qazaqqa "resmi Beyjiñ biligin sınadı"degen jeleumen izdeu jariyalandı. Qazaqstan azamattığın alğan adamdardıñ qwjattarı tartıp alınıp, olardıñ eki el arasında erkin jürip-twruına türli kedergiler jasaldı. Mısalğa Altay aymağında Manaphan esimdi azamat Qazaqstannan Qwran kärim kitabın alıp barğanı üşin Erkeş jäne Bekiş esimdi eki wlımen birge "özge din ağımdarın nasihattadı" degen ayıppen 7 jılğa sottaldı.Tarbağatay aymağında Qıtaydağı qazaqtardı Qazaqstanğa köşuge ügittegeni üşin Ashat esimdi azamat 10 jılğa bas bostandığınan ayırıldı. Al Mori audanınıñ bas imamı Äkimiyat esimdi azamat jazıqsızdan-jazıqsız qamauğa alınıp, Qıtay türmesinde köz jwmdı. Bwl ärineäbizge jetken aqparattıñ bir böligi ğana. Al biz estimegen Qıtaydağı qazaqtarğa jasalıp jatqan zorlıq-zombılıqtar qanşama?!

Qıtaydağı qazaq qandastarımız ay men künniñ amanında osılay biri azamattarınan ayırılıp, biri türmege qamalıp jatqanda Qazaqstan biliginiñ ünsiz otıra beruiniñ sırı ne de? Älde külli qazaq jwrtı estip, bilip otırğan qaralı habardan Aqorda habarsız ba? Jay uaqıtta elbasınıñ tapsırmasın bwljıtpay orındaytın Sırtqı ister ministri Qayrat Äbdirahmanov bwl iske nege qol qusırıp qarap otır? Nege Qıtay eline resmi hat joldap, mäseleniñ män-jayın anıqtaudıñ ornına jwmğan auızdarın aşpay otır?

Ötken ayda Astanada Düniejüzi qazaqtarı qwrıltayında elbasınıñ aytqan sözin bılay qoyğanda, Düniejüzi qazaqtarı qauımdastığınıñ jaña basşılığı nege tiisti orındarğa barıp, sırttağı qazaqtardıñ müddesin qorğau kerektigi jayında talap-tilekterin aytpay qauımdastıq qabırğasına qamalıp otır? Älde jaña basşılıq ta aldıñğı basşı Talğat Mamaşev sekildi «oralmandardı wrmaudan» bası auırıp jürme?!. Äytpese adam ölimi bolğanğa deyin ünsiz otırğan qauımdastıqtıñ tört qabırğağa qarap otıra beretindey ne bastarına kün tudı?! Köpirip köp aytatın Täuelsiz Qazaqstannıñ qaq ortasında twrğan olarğa jwmıs isteuge ne kedergi?! Aynalıp kelgende bwl mäsele şır-pır bolıp jürgen birdi-ekili qazaq tildi BAQ ökilderiniñ aynalısatın düniesi emes, tikeley Düniejüzi qazaqtarı qauımdastığınıñ atqaratın mindeti ekendigin aytıp  tüsindiretin tiri pende bar ma sol qauımdastıq işinde?!

Egersol tiri jandar qauımdastıq işinde bar bolsa, osı 20 kün işinde tiisti adamdar özine mindettelgen jwmıstı dwrıstap atqarğan bolsa, onda bwl mäsele adam şığınına deyin barmas edi.

Endi ketken kemşilikti tüzetip, orın alğan olqılıqtıñ orının kim toltıradı? Bwl ärine ülken swraq. Jalpı Qazaqstan memleketi sırttağı qazaqtardı elge äkeluge, olardıñ müddesin älemniñ qay tükpirinde jürse de qorğauğa qwlıqtı bolsa, onda Düniejüzi qazaqtarı qauımdastığınan bastap, Sırtqı ister ministrligine deyin birigip qoyan-qoltıq jwmıs jasauı tiis şığar. Sebebi özge elde jürip, jüregi özim dep soqqan qazaqtar özimizden özge eşkimge kerek emes. Prezident Nwrswltan Nazarbaevtıñ "Barşa qazaqtıñ tarihi otanı bireu, ol - Qazaqstan" dep aytqan sözi aqiqatqa aynalmasa, onıñ özine de, tapsırmasın orındauşı topqa da ülken sın.

“The Qazaq Times”