Foto: ontustik.gov.kz

Oñtüstik Qazaqstan oblısı Qazığwrt, Sarıağaş jäne Maqtaral audandarınıñ 700 mıñğa tarta halıqtı sapalı auız sumen qamtamasız etu mäselesi aldağı 5 jılda tolıq şeşimin tabadı. Jergilikti bilik atalğan mäseleni Ögem özenin auız su retinde paydalanu arqılı tüpkilikti şeşuge bel buıp otır, dep habarlaydı OQO äkimdiginiñ baspasöz qızmeti.

Osı maqsatta biılğı jıldıñ 15 aqpanında Qazaqstan men Özbekstan Ükimeti ökilderiniñ ekijaqtı ıntımaqtastıqtı jetildiru mäseleleri jönindegi birlesken jwmıs tobı bas qosqan bolatın.

Atalğan mäjiliste  Ögem özeninen kölemi sekundına 3-3,5 tekşe metrge deyin sudı bwrıp atalğan audandardıñ twrğındarına auız su retinde paydalanu mäselesi qaralıp, oñ şeşimin taptı. Ol üşin Qazığwrt audanınıñ Ögem auılı twsınan  Ögem özeninen qwbır arqılı su bwru jwmıstarı jürgizilui tiis.

«Eger qazirgi kelissözder nätijeli ayaqtalsa, joğarıda atalğan problemanı tüpkilikti şeşuge boladı»,- deydi oblıstıq energetika jäne twrğın üy kommunaldıq şaruaşılığı basqarmasınıñ basşısı Marğwlan Marayım.

Ögem özeniniñ basım böligi Qazaqstan Respublikası aumağında ornalasıp, körşiles Özbekstan Respublikasında işinara ornalasqan transşekaralıq özenge jatadı.

Bwdan bölek, qazir oblısta jer astı su qorın anıqtau jwmıstarı jürgizilip jatır. Jalpı öñirde su qorın anıqtaudı qajet etetin 383 eldi meken bolsa, bügingi tañğa sonıñ 244-inde izdeu-barlau jwmıstarı ayaqtalğan. 2017 jılı 34 eldi mekende, al 2019 jılğa deyin qalğan 105-inde tiisti jwmıstar atqarıladı dep kütilude. Bwl bağıtqa 1,6 mlrd teñge bağıttalğan.

Sonday-aq biıl jañadan 10 eldi mekendi ortalıqtandırılğan auız sumen qamtu jwmıstarı jürgizilude. Nätijesinde auız sumen qamtılğan eldi mekender sanı 628-ge jetkiziletin boladı. Bwl öñirdegi twrğındardı qamtu deñgeyin 74,4%-ğa köteredi.

Jalpı 2020 jılğa 702 eldi mekenderge auız su jüyesin jürgizip, twrğındardıñ qamtu deñgeyin 83,2% jetkizu josparlanuda. Bwl rette auız sudı twrğındarğa üzdiksiz 24 sağat beruge nazar audarılatın boladı.

“The Qazaq Times”