فوتو: ontustik.gov.kz

وڭتۇستىك قازاقستان وبلىسى قازىعۇرت، سارىاعاش جانە ماقتارال اۋداندارىنىڭ 700 مىڭعا تارتا حالىقتى ساپالى اۋىز سۋمەن قامتاماسىز ەتۋ ماسەلەسى الداعى 5 جىلدا تولىق شەشىمىن تابادى. جەرگىلىكتى بيلىك اتالعان ماسەلەنى وگەم وزەنىن اۋىز سۋ رەتىندە پايدالانۋ ارقىلى تۇپكىلىكتى شەشۋگە بەل بۋىپ وتىر، دەپ حابارلايدى وقو اكىمدىگىنىڭ ءباسپاسوز قىزمەتى.

وسى ماقساتتا بيىلعى جىلدىڭ 15 اقپانىندا قازاقستان مەن وزبەكستان ۇكىمەتى وكىلدەرىنىڭ ەكىجاقتى ىنتىماقتاستىقتى جەتىلدىرۋ ماسەلەلەرى جونىندەگى بىرلەسكەن جۇمىس توبى باس قوسقان بولاتىن.

اتالعان ماجىلىستە  وگەم وزەنىنەن كولەمى سەكۋندىنا 3-3,5 تەكشە مەترگە دەيىن سۋدى بۇرىپ اتالعان اۋدانداردىڭ تۇرعىندارىنا اۋىز سۋ رەتىندە پايدالانۋ ماسەلەسى قارالىپ، وڭ شەشىمىن تاپتى. ول ءۇشىن قازىعۇرت اۋدانىنىڭ وگەم اۋىلى تۇسىنان  وگەم وزەنىنەن قۇبىر ارقىلى سۋ بۇرۋ جۇمىستارى جۇرگىزىلۋى ءتيىس.

«ەگەر قازىرگى كەلىسسوزدەر ناتيجەلى اياقتالسا، جوعارىدا اتالعان پروبلەمانى تۇپكىلىكتى شەشۋگە بولادى»،- دەيدى وبلىستىق ەنەرگەتيكا جانە تۇرعىن ءۇي كوممۋنالدىق شارۋاشىلىعى باسقارماسىنىڭ باسشىسى مارعۇلان مارايىم.

وگەم وزەنىنىڭ باسىم بولىگى قازاقستان رەسپۋبليكاسى اۋماعىندا ورنالاسىپ، كورشىلەس وزبەكستان رەسپۋبليكاسىندا ءىشىنارا ورنالاسقان ترانسشەكارالىق وزەنگە جاتادى.

بۇدان بولەك، قازىر وبلىستا جەر استى سۋ قورىن انىقتاۋ جۇمىستارى جۇرگىزىلىپ جاتىر. جالپى وڭىردە سۋ قورىن انىقتاۋدى قاجەت ەتەتىن 383 ەلدى مەكەن بولسا، بۇگىنگى تاڭعا سونىڭ 244-ىندە ىزدەۋ-بارلاۋ جۇمىستارى اياقتالعان. 2017 جىلى 34 ەلدى مەكەندە، ال 2019 جىلعا دەيىن قالعان 105-ىندە ءتيىستى جۇمىستار اتقارىلادى دەپ كۇتىلۋدە. بۇل باعىتقا 1,6 ملرد تەڭگە باعىتتالعان.

سونداي-اق بيىل جاڭادان 10 ەلدى مەكەندى ورتالىقتاندىرىلعان اۋىز سۋمەن قامتۋ جۇمىستارى جۇرگىزىلۋدە. ناتيجەسىندە اۋىز سۋمەن قامتىلعان ەلدى مەكەندەر سانى 628-گە جەتكىزىلەتىن بولادى. بۇل وڭىردەگى تۇرعىنداردى قامتۋ دەڭگەيىن 74,4%-عا كوتەرەدى.

جالپى 2020 جىلعا 702 ەلدى مەكەندەرگە اۋىز سۋ جۇيەسىن جۇرگىزىپ، تۇرعىنداردىڭ قامتۋ دەڭگەيىن 83,2% جەتكىزۋ جوسپارلانۋدا. بۇل رەتتە اۋىز سۋدى تۇرعىندارعا ۇزدىكسىز 24 ساعات بەرۋگە نازار اۋدارىلاتىن بولادى.

“The Qazaq Times”