Qıtaydağı jankeşti jarılıs oqiğası. Foto: Franciya Halıqaralıq televiziyası.

Qıtay ükimeti resmi mälimdeme jariyalap, eldiñ şığıs provinciyalarınıñ birinde orın alğan jarılıstan 8 adam qaza tapqanın habarladı. Jarılıs 15 mausım küni tüsten keyin, Jiyañsu provinciyasındağı bir balabaqşanıñ mañında orın alğan. Bwl turalı «The Wall Street Journal» basılımı habarlap otır.

Jergilikti BAQ ökilderiniñ habarına süyensek, jarılıstı bastapqıda qaqpa mañındağı tamaq satatın jıljımalı düñgirşektiñ gaz ballonınan tuındağan degen boljam jasalğan. Qıtay ükimetiniñ resmi baspasöz qızmeti eldiñ Ortalıq televiziyasına (China Central Television/CCTV) bergen habarında, Memlekettik qauipsizdik organdarınıñ mälimeti boyınşa jarılıstı 22 jastağı Şüy (Xu) esimdi er adamnıñ jasağanı anıqtaldı dedi.  Jarılıs tudıruşı özi de qaza tapqan.

Jarılıs bolğan balalar baqşası. Foto: The Wall Street Journal.

Qıtay Ortalıq televiziyasınıñ bergen habarında, oqiğada 8 adam qaza bolıp, 65 adam türli jaraqat alğan. Tergeuşilerdiñ aytuınşa, jarılıs bolğan jerden qoldan jasalğan jarılğıştıñ qaldıqtarı tabılğan. Sonday-aq, balabaqşa janındağı qabırğalarğa «ölim», «öltiru», «qıru», «jaru» degen sözderdiñ jazılğanı aytıldı.

Jarılıs Qıtaydıñ Jiyañsu provinciyasına qarastı Şüyjou qalasında bolğan. Jergilikti ükimet orınnıñ aytuınşa, jarılıs bolğan kezde balabaqşadağılar jwmıstan qaytıp ketkendikten, zardap şekkender arasında balalar men balabaqşa qızmetkerleri bolmağan.

“The Qazaq Times”