الماتىدا بەيبىت ميتينگكە تىيىم سالىنۋى مۇمكىن. بۇل تۋرالى سەيسەنبى كۇنگى بريفينگتە الماتى قالاسىنىڭ باس سانيتار-دارىگەرى جانداربەك بەكشين مالىمدەدى.

باسقارما باسشىسى كوروناۆيرۋس ينفەكتسياسىنىڭ ورشۋىنە بايلانىستى بەيبىت جينالىستارعا تىيىم سالۋدى قاراستىرىپ جاتقانىن جەتكىزدى.

«قىركۇيەك ايىندا بەيبىت ميتينگە رۇقسات بەرىلگەن ەدى. الەۋمەتتىك قاشىقتىقتى ساقتاي وتىرىپ دەزينفەكتسيا قۇرالدارىن قولدانۋ ارقىلى ميتينگىلەر وتكىزىلدى. ول كەزدە اۋرۋ قالىپتى دەڭگەيدە ەدى. بىراق قازىر جاعداي وزگەرۋدە. سوعان بايلانىستى ميتينگ شارالارىن شەكتەۋ قاراستىرىلىپ جاتىر»، – دەدى ول.

ونىڭ ايتۋىنشا، ساۋدا الاڭدارىنىڭ جۇمىس ىستەپ تۇرعانى «حالىققا دا، مەملەكەت ءۇشىن دە پايدالى». بۇل نىسانداردا كوروناۆيرۋس جۇقتىرۋ قاۋپى سانيتارلىق تالاپتاردى ساقتاۋعا بايلانىستى ەكەنىن ايتادى. سونداي-اق، ەپيدەميانىڭ كۇزگى تولقىنى قارساڭىندا 10 ادامنان ارتىق ادامنىڭ توپتاسۋىنا دا تىيىم سالىنادى.

پاندەميا باستالار تۇستا باسى داۋعا قالىپ، شەنى مەملەكەتتىك باس سانيتار-دارىگەرىنەن قالالىق دەڭگەيگە تومەندەگەن جانداربەك بەكشين ساياسي ناۋقان قىزا باستاعان شاقتا ەكى اي بۇرىنعى بەيبىت جيىندارعا باعا بەرە باستادى. ءتىپتى جۋرناليستەر مەن بلوگەرلەردىڭ توپتاسىپ ءجۇرۋىن بورودينو شايقاسىنا تەڭەدى.

بۇعان دەيىن «ار.رۋح.حاق» قوعامدىق قورىنىڭ پرەزيدەنتى باقىتجان تورەعوجينا مەن Liberty قورىنىڭ پرەزيدەنتى، قۇقىق قورعاۋشى عالىم اعەلەۋوۆ بىرىگىپ، الماتى اكىمدىگىنەن 31 قىركۇيەك كۇنى ميتينگ وتكىزۋگە رۇقسات بەرىلگەنىن حابارلاعان. جيىن «ساياسي رەفورما جۇرگىزۋ جانە ساياسي سەبەپپەن قۋدالاۋدى توقتاتۋ» تاقىرىبىندا ميتينگ وتكىزگىسى كەلەتىنىن مالىمدەپ، جەرگىلىكتى اتقارۋ ورگانىنا وتكىزگەن ءۇشىنشى وتىنىشىنەن كەيىن عانا رۇقسات العان. 500 ادامعا ارنالعان بەيبىت شەرۋ جاقىنداعان تۇستا بيلىك ەرەكشە شەشىم قابىلداپ جاتىر. كينوتەاتر مەن تەاتر جۇمىسىنا رۇقسات بەرىپ، بىراق ازاماتتىق قوعامنىڭ تالاپ جيىنىن وتكىزۋىنە توسقاۋىل قويماق.

“The Qazaq Times”