اراب تۇبەگىندە «ءال-كايدا» توبى جاڭا ليدەرىن جاريا ەتتى

«تىكەلەي بارلاۋ ۇيىمى» (The Site Intelligence Group) جەكسەنبى كۇنى تاراتقان مالىمەتىندە، «ءال-كايدا» توبىنىڭ اراب تۇبەگىندەگى ليدەرى كاسسيم ءريميدىڭ ولگەنىن راستادى، سونداي-اق، اتالعان تەررورلىق توپتىڭ يەمەندەگى جاڭا جەتەكشىسى حاليد باتافي دەپ جاريا ەتتى.

امەريكا قۇراما شتاتتارىنىڭ پرەزيدەنتى دونالد ترامپ اقپاننىڭ باس شەنىندە يەمەندەگى اسكەري وپەراتسيا كەزىندە سول وڭىردەگى «ءال-كايدا» جەتەكشىسى ءال-ءريميدىڭ ولتىرىلگەنىن مالىمدەگەن ەدى. بۇعان قوسا قۇراما شتات ۇكىمەتى «ءال-كايدانى» اراب تۇبەگىندەگى ەڭ قاۋىپتى توپتاردىڭ قاتارىندا سانايدى. ترامپ مالىمدەمەسىندە اتالعان توپتىڭ يەمەندەگى مۇشەلەرى اقش اسكەرلەرىنە بىرنەشە رەت شابۋىل جاساعان.

ءال-ريمي ءوزى مۇشە بولعان تەررورلىق توپ ىشىندە جوعارى بەدەلگە يە، 2006 جىلى اقپان ايىندا يەمەندە تەررورلىق توپقا قارسى جۇرگىزىلگەن قارۋلى وپەراتسيادا 23 جاقتاسىمەن بىرگە امان قۇتىلىپ كەتكەن. ول يەمەندەگى بىرقاتار تەررورلىق شابۋىلدارعا قاتىسى بار دەپ تانىلعان. اقش ۇكىمەتى ءال-ريمي تۋرالى انىق مالىمەت بەرۋشىگە 10 ملن دوللار سىياقى دا جاريا ەتكەن.

“The Qazaq Times”