يۋنەسكو اياسىندا وتكەن الەم ەلدەرىنىڭ مادەنيەت مينيسترلەرىنىڭ فورۋمىنداعى قازاقستان دەلەگاتسياسى. فوتو: قر مجسم

150 مەملەكەتتىڭ مادەنيەت مينيسترلەرىنىڭ باسىن قوسقان يۋنەسكو فورۋمىنا مينيستر رايىمقۇلوۆا قاتىسىپ، حالىقارالىق ۇيىم باسشىسىنىڭ قابىلداۋىندا بولدى.

مادەنيەت جانە سپورت ءمينيسترى اقتوتى رايىمقۇلوۆا يۋنەسكو-نىڭ اتقارۋشى ديرەكتورى ودرە ازۋلەنىڭ شاقىرۋىمەن مادەنيەت مينيسترلەرىنىڭ فورۋمىنا قاتىستى. پاريجدەگى ۇيىمنىڭ شتاب-پاتەرىندە ءوتىپ جاتقان ءىس-شاراعا 150 مەملەكەتتىڭ ءمينيسترى جينالدى.

«قوعامدىق مادەنيەت الەۋمەتتىك جانە قالا وزگەرىسىنىڭ قوزعاۋشى كۇشى» اتتى سەسسياعا قاتىسقان مينيستر ەلىمىزدەگى مادەنيەت سالاسىنىڭ ماڭىزدى باعىتتارى مەن قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ «رۋحاني جاڭعىرۋ» باعدارلامالىق ماقالاسى مەن پرەزيدەنت ق.ك.توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» جولداۋى اياسىنداعى اتالعان سالا بويىنشا اتقارىلىپ جاتقان جۇمىستارمەن تانىستىردى.

سونىمەن قاتار، اقتوتى راحمەتوللاقىزى ەلىمىزدە بۇۇ-نىڭ تۇجىرىمداماسىنا ساي ءتۋريزمدى دامىتۋ، رۋحاني قۇندىلىقتاردى ناسيحاتتاۋ جانە تاريحي ەسكەرتكىشتەردى قورعاۋ باعىتىندا جۇرگىزىلىپ جاتقان جۇيەلى جۇمىستار تۋرالى ايتتى.

ءسوز سوڭىندا اقتوتى رايىمقۇلوۆا يۋنەسكو-عا مۇشە ەلدەردى ۇلى اقىن اباي قۇنانبايۇلىنىڭ 175 جىلدىعى مەن «ەكىنشى ۇستاز» اتانعان ءال-ءفارابيدىڭ 1150 جىلدىق مەرەيتويى قارساڭىندا وتەتىن مادەني، عىلىمي-تانىمدىق ءىس-شارالارعا بەلسەنە قاتىسۋعا شاقىردى.

يۋنەسكو اتقارۋشى ديرەكتورى ودرە ازۋلەمەن كەزدەسۋ بارىسىندا مينيستر قازاقستان مەن ۇيىم اراسىنداعى مادەنيەت جانە سپورت سالاسىنداعى ماڭىزدى ماسەلەلەر مەن ارىپتەستىك رەتىن تالقىلادى. كەلىسسوز بارىسىندا جاقىندا عانا الماتىدا قۇرىلاتىن حالىقارالىق مادەني بايلانىستار ورتالىعىنىڭ العاشقى جوباسى مەن تۇركىستان قالاسىنىڭ دامۋ جوسپارىمەن ءبولىستى. مينيستر تۇركى الەمىنىڭ ورتالىعى سانالاتىن تۇركىستاندى دامىتۋ مەن قوجا احمەت ياسساۋي كەسەنەسىن قورعاۋ ەڭ جوعارى حالىقارالىق تالاپتارعا ساي جۇرگىزىلەتىنىن اتاپ ءوتتى.

سونداي-اق، اقتوتى رايىمقۇلوۆا فورۋم اياسىندا وتكىزىلگەن بىرنەشە ءىس-شاراعا قاتىستى. سونىڭ ىشىندە ءمينيستردىڭ قاتىسۋىمەن وتكەن «ينديگو بوياۋىنىڭ ىزىمەن» اتتى حالىقارالىق كورمەدە ايجان بەكقۇلوۆا مەن تامارا كاپقىزىنىڭ كيىز باسۋ ونەرى كەڭىنەن تانىستىرىلدى.

مادەنيەت ءمينيسترى اقتوتى رايىمقۇلوۆا يۋنەسكو-نىڭ اتقارۋشى ديرەكتورى ودرە ازۋلەنىڭ شاقىرۋىمەن مادەنيەت مينيسترلەرىنىڭ فورۋمىنا قاتىستى. فوتو: قر مجسم

مينيستر اقتوتى رايىمقۇلوۆا يۋنەسكو-نىڭ اتقارۋشى ديرەكتورى ودرە ازۋلەمەن كەزدەسۋدە. فوتو: قر مجسم

قازاقساننىڭ مادەنيەت ءمينيسترى وزگە ەلدەردىڭ مينيسترلەرى اراسىندا. فوتو: قر مجسم

"The Qazaq Times"