تۇركياداعى سۇريالىق بوسقىن بالالار. فوتو: The Times.

تۇركيانىڭ ىشكى ىستەر مينيسترلىگى ەلدەگى ميگرانتتار تۋرالى مالىمەتتەردى جاريا ەتىپ، تۇركيادا پانالاپ جۇرگەن 3,5 ميلليونعا جۋىق سۇريالىق بوسقىننىڭ بار ەكەنىن حابارلادى. بۇل تۋرالى سول ەلدىڭ «انادولى» اقپاراتتىق اگەنتتىگى حابارلادى.

تۇركيا ءىىم-نىڭ ميگراتسيا ديرەكتسياسىنىڭ مالىمەتتەرىنە قاراعاندا ەلدە ءسۇريادان باس ساۋعالاي كەلگەن 3 424 237 سۇريالىق ازامات بار. ولاردىڭ اراسىندا 1 852 563 ەر، 1 571 674 ايەل بار. تۇركياداعى 3,5 ملن ادامعا جۋىق ءسۇريا بوسقىندارىنىڭ باسىم كوبى 29 جاسقا دەيىنگىلەر، ايتالىق وسى جاس مولشەرىندەگى 2 ملن 462 مىڭعا جۋىق سۇريالىق بار. سونىڭ ىشىندە 4 جاسقا دەيىنگى 515 مىڭ 116 بالانىڭ بار ەكەنى بەلگىلى بولعان.

تۇركياداعى ءسۇريا بوسقىندارى ستامبۋل قالاسىنا كوبىرەك شوعىرلانعان، اتالعان قالادا 537 مىڭ 829 ءسۇريا ازاماتى بار. ستامبۋلدان كەيىن رەتىمەن شانلىۋرفا، حاتاي، گازيانتەپ، مەرسين، ادانا، بۋرسا، كيليس، يزمير جانە كونيا قالالارىنا تارالعان.

“The Qazaq Times”