![](https://qazaqtimes.com/kk/content/uploads/2017/12/01-7-800x480.jpg?token=def63be2d976b0add421ca7588e6e004)
كەشە ساياساتكەر ميحايل سااكاشۆيليدى ءۇيىنىڭ شاتىرىندا قولعا ءتۇسىرىپ، تۇتقىنداۋعا الىپ كەتۋگە كەلگەن پوليتسيا حالىقتىڭ تاراپىنان ۇلكەن قارسىلىققا ۇشىرادى. كيەۆتە بىرنەشە ساعاتقا سوزىلعان قارسىلىق ناتيجەسىندە، حالىق ميحايل سااكاشۆيليدى قۇقىق قورعاۋ قىزمەتكەرلەرىنىڭ قولىنان بوساتىپ الدى. بۇل تۋرالى ۆۆس اقپاراتتىق اگەنتتىگى وقيعا ورنىنان ارنايى رەپورتاج جاسادى.
ميحايل سااكاشۆيليگە رەسەيمەن استىرتىن بايلانىسى بار، قىلمىستىق توپتاردى قارجىلاندىرعان دەگەن ايىپتار تاعىلىپ وتىر. ونىڭ قورعاۋشىسى ساياساتكەردى "مەملەكەتتىك توڭكەرىس" جاساماق بولعان دەگەن كۇدىكپەن ۇستاعانىن ايتادى. ميحايل سااكاشۆيلي كولىككە بەت العان كەزدە جينالعان حالىققا "قارسىلىق بىلدىرىڭدەر! بۇل - زاڭسىزدىق" (سوپروتيۆليايتەس! ەتو - بەززاكونە) دەپ داۋىستادى.
ميحايل سااكاشۆيليدى اباقتىعا الىپ كەتۋى كەرەك بولعان كولىك اينالا قورشاعان حالىق پەن پوليتسيا قاقتىعىسىنان قوزعالا الماي ۇزاق تۇردى. قۇقىق قورعاۋ قىزمەتكەرلەرى حالىققا قارسى اششى گاز قولداندى. سوڭىندا كوپتىڭ قارسىلىعى ناتيجەلى اياقتالىپ، ميحايل سااكاشۆيلي كولىكتەن بوساتىلدى. ءوز قولداۋشىلارىنىڭ اراسىندا تۇرعان ول تىلشىگە بەرگەن سۇحباتىندا ءوزىنىڭ تۇتقىندالۋىن "ساياسي موتيۆتەرمەن" بايلانىستىرادى.