فوتو: APF

الداعى ۋاقىتتا يسپانيا كونستيتۋتسياسىنا  ايماقتاردىڭ تاۋەلسىزدىك تۋرالى رەفەرەندۋمدار وتكىزۋىنە رۇقسات بەرەتىن ءبولىم ەنگىزىلۋى مۇمكىن. بۇل تۋرالى ۆۆس-گە بەرگەن سۇحباتى بارىسىندا يسپانيانىڭ سىرتقى ىستەر ءمينيسترى الفونسو داستيس حابارلادى. 

بۇل جاڭاشىلدىق كاتالونيادا وتكەن رەفەرەندۋمعا بايلانىستى تۋىنداعان ساياسي داعدارىستىڭ قايتالانباۋى ءۇشىن قولعا الىنباق. دەگەنمەن بۇل يسپانيانىڭ كاتالونيا ارەكەتىن اقتاعانىن بىلدىرمەيدى. ويتكەنى كاتالونيانىڭ بۇرىنعى باسشىلارىن تۇتقىنداۋ تۋرالى بۇيرىققا قارسى نارازىلىق شەرۋلەرى ءوتىپ جاتقانىنا قاراماستان، يسپانيانىڭ جوعارعى سوتى رەفەرەندۋمدى "كونستيتۋتسياعا قايشى جانە زاڭدى كۇشى جوق" دەپ تاپقان پىكىرىن وزگەرتپەدى.

سىرتقى ىستەر ءمينيسترى كاتالوندىقتاردىڭ تاۋەلسىزدىككە ۇمتىلىسىنا ءمان بەرىپ، كونستيتۋتسياعا وزگەرىس ەنگىزۋ مۇمكىندىگىن زەرتتەۋ ءۇشىن پارلامەنتتە ارنايى كوميتەت قۇرىلعانىن جەتكىزدى. ول سونداي-اق ساياسي داعدارىس سالدارىنان زارداپ شەككەن كاتالوندىقتاردان كەشىرىم سۇرادى. وسىدان بۇرىن الفونسو داستيس پوليتسيامەن قاقتىعىس ساتىنەن جاريالانعان كەيبىر سۋرەتتەردىڭ جالعان ەكەندىگىن ايتقان بولاتىن.

كونستيتۋتسيانى قايتا قاراۋ تۋرالى باستاما سەپاراتيستەردىڭ تاۋەلسىزدىك ءۇشىن قوزعالىستارىنىڭ قايتا جاندانۋىنا اكەلۋى مۇمكىن. ويتكەنى بۇل ولارعا ەندى زاڭ جۇزىندە ەركىن رەفەرەندۋم وتكىزۋ قۇقىعىن الۋعا ءۇمىت سىيلايدى. بىراق مۇندا ەسكەرەتىن ءبىر جايت تاعى بار. ەگەر كونستيتۋتسياعا اتالعان وزگەرىس ەنگىزىلسە، وندا يسپانيانىڭ 47 ملن حالقىنىڭ دا كاتالونيانىڭ  بولىنۋىنە قاتىستى پىكىرى ەسكەرىلەتىن بولادى. يسپانيانىڭ سىرتقى ىستەر ءمينيسترى قۇقىق بەرۋ تۋرالى باستامانى قولدايتىنىن، بىراق تەك كاتالوندىقتاردىڭ عانا مۇددەسىن ەسكەرەتىن كارلەس پۋدجەمونت ۇسىنعان جۇيەگە قارسى ەكەندىگىن ءبىلدىردى.

كاتالونياداعى كوتەرىلىستەر ءالى دە جالعاسىن تاۋىپ جاتىر. بىرقاتار ماڭىزدى كوشەلەر جابىلىپ، جۇزدەگەن ادامدار كاتالونياداعى پرەزيدەنت ءۇيىنىڭ الدىنا جينالعان. كاتالونيادا 21 جەلتوقسانعا بەلگىلەنگەن سايلاۋعا قاتىساتىن تاۋەلسىزدىكتى جاقتاۋشى پارتيالاردى ءبىر فرونتقا بىرىكتىرۋ تۋرالى وي ءالى جۇزەگە اسپاي وتىر. ءوڭىردىڭ بۇرىنعى باسشىسى 17 قاراشا كۇنى يسپانياداعى سوتقا كەلەدى دەپ كۇتىلۋدە.

“The Qazaq Times”