قىتاي باسشىسى اقش پرەزيدەنتىن سابىرعا شاقىردى

قىتاي رەسمي اقپارات كوزدەرىنىڭ حابارىنا قاراعاندا، قحر باسشىسى شي جينيڭ (سي تسزينپين) اقش پرەزيدەنتى دونالد ترامپتى سولتۇستىك كورەيا ماسەلەسىندە سابىرلى بولۋعا شاقىرعان. وعان قوسا رەسمي بەيجىڭ تارابىنىڭ بۇۇ قاۋىپسىزدىك كەڭەسىنىڭ قارارىن بۇزاتىن ارقانداي ارەكەتكە قارسى ەكەنىن بىلدىرگەن.

“The Wall Street Journal” باسىلىمىنىڭ حابارىنا قاراعاندا، كەشە 24 ءساۋىر كۇنى اقش-قىتاي باسشىلارى تەلەفوندا سويلەسكەن. بۇل اتالعان ءبىر ماسەلە تۋراسىندا ەكى اپتا ىشىندە قوس تاراپتىڭ ەكىنشى رەت تەلەفون ارقىلى كەڭەسۋى. ازىرگە دەيىن ءۇش مارتە قوڭىراۋ شالىسقان ەكى باسشى وسى ايدىڭ باس شەنىندە فلوريدادا كەزدەسۋ وتكىزگەنى دە بەلگىلى. الايدا، سولتۇستىك كورەيا ماسەلەسىندە ەكى باسشىنىڭ ويى ءبىر جەردەن شىقپاعان بولاتىن.

قىتاي باسشىسىمەن تەلەفوندا كەڭەسۋى اياقتالا سالىسىمەن، ترامپ جاپونيانىڭ باس ءۋازىرى (پرەمەر-ءمينيسترى) شينزو ابەمەن (Shinzo Abe) دە حابارلاسىپ كەڭەس وتكىزگەن. قوڭىراۋدان كەيىن جاپون پرەمەرى حابارلاما جاريالاپ، ترامپتىڭ ءسوز ارەكەتىنەن ونىڭ بارلىق مۇمكىندىكتەردى قاراستىرىپ جاتقانىن بايقاۋعا بولاتىنىن ايتقان.

قىتاي رەسمي اقپارات كوزدەرىندە، قىتاي باسشىسىنىڭ: «كورەي تۇبەگى ماسەلەسىندە بارلىق تاراپ جاعدايدى ۋشىقتىراتىن ارەكەتتەردەن باس تارتۋى كەرەك. ەكى ەل باسشىلىعى تىعىز بايلانىستى ساقتاۋعا كەلىستى»، – دەگەن ءسوزى جاريا بولدى.

اق ءۇي قاتىستى حابارلاردى ءار ەلدەگى ەلشىلىكتەرىنىڭ رەسمي ۆەب-سايتتارىندا جاريالاپ تۇراتىندىعىن ايتتى.

The Qazaq Times