قوناەۆ سوتى تۇرمەدەگى بەلسەندى ەرمەك نارىمبايدىڭ مەرزىمىنەن ەرتە بوساپ شىعۋ تۋرالى ءوتىنىشىن ورىندامادى. بۇل جونىندە ادۆوكاتى جانار بالعاباەۆا حابارلادى. ونىڭ ايتۋىنشا، سوت بەلسەندىنىڭ تۇرمەدە ايىپپۇلدارى بارىن العا تارتقان. بۇل تۋرالى ورتالىق ازيا جاڭالىقتار قىزمەتى جازدى.

"ايىپپۇلى بار دەپ جانە ء"تارتىپتى ورەسكەل بۇزۋشى" دەپ ءوتىنىشىن ورىندامادى. ايىپپۇل وعان بيىل ماۋسىمدا سالىنعان. ءبىز ايىپپۇلعا قاتىستى شاعىم تۇسىرگەنبىز. ول بويىنشا تۇپكىلىكتى شەشىم قابىلدانباعان بولاتىن. [سوعان قاراماستان] سوتتا ونىڭ ايىپپۇلى بار دەپ ەسەپتەلىندى" دەدى جانار بالعاباەۆا ازاتتىق تىلشىسىنە.

ءىستى سۋديا ولجاس كۇرەڭبەكوۆ قاراعان. ادۆوكات شەشىمدى اپەللياتسياعا بەرەتىنىن ايتتى.

ازاتتىق قوناەۆ سوتىنان ازىرگە جاۋاپ الا المادى.

قۇقىق قورعاۋشىلار جاساعان "ساياسي تۇتقىندار" تىزىمىنە ەنگەن 52 جاستاعى نارىمباي ساياسي بەلسەندىلىگى ءۇشىن بىرنەشە رەت قىلمىستىق جازاعا كەسىلگەن. 2015 جىلى قازاندا "الاۋىزدىق تۋدىردى" دەگەن ايىپپەن ءۇش جىلعا سوتتالعان. كەيىن اپەللياتسيا سوتى ۇكىمدى جەڭىلدەتىپ، ءۇش جىل شارتتى جازاعا اۋىستىرعان.

وسىدان كەيىن ەرمەك نارىمباي وزىنە بيلىكتەن قاتەر تونگەنىن ايتىپ، ۋكرايناعا كەتكەن. بيىل اقپاننىڭ باسىندا قازاقستانعا ورالعاندا پوليتسيا ونى الماتى اۋەجايىنان بىردەن ۇستاپ اكەتىپ، قاماۋعا العان. ادۆوكاتتىڭ ايتۋىنشا، 2,5 جىل تۇرمەگە كەسىلگەن نارىمباي جازاسىنىڭ ۇشتەن ءبىرىن وتەگەن.

جۋىردا بەلسەندى 54 كۇن اشتىق ۇستاپ، كەزەكتەن تىس پرەزيدەنت سايلاۋ قارساڭىندا سايلاۋ ۋچاسكەلەرىندەگى حاتتامالاردى ونلاين جاريالاۋدى تالاپ ەتكەن. ورتالىق سايلاۋ كوميسسياسى ونىڭ تالابى ء"بىر كۇندە ورىندالاتىن شارۋا ەمەس" دەگەن. شامامەن 20 كيلودان استام سالماق جوعالتىپ، دەنساۋلىعى ناشارلاعان بەلسەندى 25 قاراشا كەشكە اشتىعىن توقتاتتى. ەرمەك نارىمباي بۇعان دەيىن دە ەڭ ۇزاق اشتىق اكتسيالارىن باسىنان وتكەرگەن. 2010 جىلى الماتى وبلىسىنداعى تۇرمەدە 73 كۇن اشتىق ۇستاعان بەلسەندى 41 كيلوگرام سالماق جوعالتقان. ءوزىنىڭ ايتۋىنشا، "وزىنە جاسالعان ادىلەتسىزدىكتەرگە" قارسىلىق بىلدىرگەن.