ەو بارلىق ەلەكتروندىق قۇرىلعىلاردى ءبىر تۇردەگى قۋاتتاعىشقا مىندەتتەمەك

ەۋروپالىق وداق تەلەفوندار، پلانشەتتەر، نوۋتبۋكتەر جانە باسقا دا ەلەكتروندى قۇرىلعىلاردىڭ بارلىق وندىرۋشىلەرىن ءبىر زاريادتاۋ پورتى ستاندارتىنا - USB Type-C ستاندارتىنا كوشۋدى مىندەتتەگەلى وتىر. اتالمىش ەرەجە، 2024 جىلدىڭ كۇزىنەن باستاپ جۇزەگە اسىرىلۋى مۇمكىن. ەرەجە ەنگىزىلگەننەن كەيىن باسقا زاريادتاعىشتارى بار قۇرىلعىلار ەو اۋماعىندا ساتىلمايتىن بولادى.

ەو بەلگىلەگەن بۇل ەرەجە ەڭ الدىمەن ءوز قۇرىلعىلارى ءۇشىن Lightning قۋاتتاعىش پورتىن قولداناتىن امەريكالىق Apple كومپانياسىنا اسەر ەتپەك.  كومپانيا بۇل باستاماعا قاتتى قارسىلىق تانىتىپ كەلەدى. ادەتتە ونىڭ iPhone زاريادتاعىشتارى كوپتەگەن Type-C زاريادتاعىشتارىنان قىمباتىراق. Apple كومپانياسى سەيسەنبى كۇنى ەۋروپالىق قۇرىلىمدار اراسىنداعى كەلىسىمگە قاتىستى تۇسىنىكتەمە بەرە المايتىندارىن مالىمدەدى. بۇعان دەيىن Apple ءبىر پورتقا كوشۋ «يننوۆاتسيانى تۇنشىقتىراتىنىن» ايتقان.

ەۋروپارلامەنت پەن ەۋروپا كەڭەسىنىڭ وكىلدەرى بۇرىن راديوتەحنيكاعا قاتىستى ديرەكتيۆانى كەلىسكەن بولاتىن. ءىس جۇزىندە بۇل ەو نوۋتبۋكتەرگە، تەلەفوندارعا، پلانشەتتەرگە جانە باسقا قۇرىلعىلارعا ارنالعان زاريادتاۋ پورتتارىنىڭ بىرىڭعاي ستاندارتىن ەنگىزۋگە ءبىر قادام جاقىنداعانىن بىلدىرەدى.

ەلەكتروندى قۇرلىعىلاردى ورتاق ءبىر قۋاتتاعىش ستاندارتىنا كەلتىرۋدىڭ وزىندىك قيىندىقتارى دا بار. ايتالىق، ارنايى ساعاتتار نەمەسە FitBit بىلەزىكتەرى سياقتى ەڭ كىشكەنتاي قۇرىلعىلار دا بولادى. سونداي-اق ەۋروپادا ولار قۇرىلعىلاردىڭ كەز كەلگەن كابەل ارقىلى جىلدام زاريادتالۋى ءۇشىن زاريادتاۋ جىلدامدىعىن ستاندارتتاۋدى قالايدى.

ەرەجە مىنالارعا قولدانىلادى:
ۇيالى تەلەفوندار
پلانشەتتەر
قۇلاققاپتار
ءپورتاتيۆتى ويىن قۇرىلعىلارى
ءپورتاتيۆتى ديناميكتەر

بۇل ەرەجەنىڭ  نوۋتبۋك  ءوندىرۋشى كومپانيالارعا دا اسەر ەتەرى انىق، بىراق ولاردىڭ وندىرۋشىلەرىنە جاڭا ەرەجەلەر كۇشىنە ەنگەننەن كەيىن ءوندىرىستى بەيىمدەۋ ءۇشىن 40 اي ۋاقىت بەرىلمەك. سونىمەن قاتار، قۇجات ساتىپ الۋشىلارعا قۇرىلعىنى زاريادتاعىشپەن نەمەسە زاريادسىز ساتىپ الۋدى تاڭداۋ قۇقىعىن بەرۋى كەرەك دەگەن ەرەجەدە قاراستىرىلعان.

«بۇل زاڭ ەو-نىڭ ونىمدەردى تۇراقتى ەتۋگە، ەلەكتروندى قالدىقتاردى ازايتۋعا جانە تۇتىنۋشىلاردىڭ ءومىرىن جەڭىلدەتۋگە باعىتتالعان جالپى كۇش-جىگەرىنىڭ ءبىر بولىگى»، - دەلىنگەن ەۋروپارلامەنت مالىمدەمەسىندە.

پارلامەنتاريلەردىڭ ايتۋىنشا، بۇل تۇتىنۋشىلارعا زاريادتاعىشتاردى ساتىپ الۋدان جىلىنا 250 ميلليون ەۋروعا دەيىن ۇنەمدەۋگە كومەكتەسەدى، ال قالدىق كولەمى جىلىنا 11 مىڭ تونناعا ازايادى.

بەيسەنعازى كۇمىسجان

The Qazaq Times