رەسەي كۇشتەرى سەۆەرودونەتسك قالاسىنا شابۋىلدى كۇشەيتتى. فوتو: Twitter

رەسەيدىڭ ۋكرايناعا باسىپ كىرگەنىنە جاقىندا 100 كۇن تولعالى تۇر. ال، ۋكراينا پرەزيدەنتى ۆولاديمير زەلەنسكي ءوز مالىمدەمەسىندە ەلدىڭ 20 پايىز تەرريتورياسى جاۋ قولىندا قالعانىن ايتتى. ونىڭ ايتىسىنشا، شەپتىڭ شەكاراسى مىڭ شاقىرىمعا دەيىن سوزىلىپ، ۋكرايناعا باعىتتالعان اگرەسسياسىنا رەسەي بارلىق اسكەري كۇشىن جۇمىلدىرىپ جاتىر.

سوعىس مايدانىنان تاراپ جاتقان حابارلارعا قاراعاندا، قازىر رەسەي كۇشتەرى سەۆەرودونەتسككە شابۋىلدارىن كۇشەيتكەن. قالانىڭ اۋقىمدى بولىگىن رەسەيلىكتەر يەلەپ العانىن بريتانيانىڭ شالعىن قىزمەتىنە ناقتىلاپ مالىمدەمە جاساعان. ۋكراينا كۇشتەرىن ارتيللەريالارمەن تىنىمسىز اتقىلاپ، شاھارداعى نەگىزگى ۇستەمدىككە يە بولا باستاعان.

سەۆەرودونەتسك قالاسىنداعى جاۋاپتاسقان ۇرىس سۇراپىل دەڭگەيدە. ۋقك تارابى كەيبىر كوشەلەردە باسىمدىق تانىتقانىمەن، رەسەي تارابى ولاردىڭ قورعانىسىن بارلىق تاراپتان بۇزىپ تاستاۋعا كۇش سالىپ جاتىر. ەگەر قالانى رەسەي كۇشتەرى وزىنە قاراتاتىن بولسا ۋكراينا ءوزىنىڭ باقىلاۋىنداعى ەڭ شىعىس شاھارىنان ايىرىلماق.

قالاداعى سوعىستىڭ جوعارى جيلىگىنەن بەيبىت تۇرعىنداردى ەۆاكۋاتسيالاۋ مۇمكىن بولماي وتىر.

ال، وڭتۇستىك-شىعىستاعى رەسەي باسىپ العان ماريۋپولدە رف كۇشتەرى رەسەي قولداۋىنداعى جاڭا بيلىككە مويىنسۇنباي، قالا اكىمشىلىگىنىڭ وكىلدەرىن جازالاۋعا تىرىسۋدا. بۇنى ءماريۋپولدىڭ بۇرىنعى مەرى ۆاديم مويچەنكو مالىمدەگەن. ول وتكەن اپتادا CNN ارناسىنا بەرگەن سۇحباتىندا رەسەيدىڭ قالانى بومبالاۋى كەزىندە كەمىندە 22 مىڭ ادام قازا تاپقانىن ايتقان بولاتىن.

باتىس ەلدەرى بولسا رەسەي پرەزيدەنتى ۆلاديمر ءپۋتيننىڭ نەگىزگى وداقتاستارىنا دا سانكتسيانى كۇشەيتەتىندەرىن ايتىپ جاتىر. بۇعان نەگىزىنەن پۋتينمەن بايلانىسى بار وليگارحتار كوزدەلىپ وتىر.

The Qazaq Times