ۋكراينا قارۋلى كۇشتەرى رەسەي شەكاراسىنا جەتتى

ۋكراينا اسكەرلەرى حاركوۆ وبلىسىنان رەسەي اسكەرلەرىن ءسۇرىپ شىعارعانىن مالىمدەدى. اتالعان ايماقتا كونتر-شابۋىل وپەراتسياسىن جۇرگىزىپ جاتقان ۋكراينالىق جاۋنگەرلەر رەسەي شەكارا سىزىعىنا دەيىن جەتكەن بەينە جانە فوتو مالىمەتتەرىن تاراتتى.

ۋكراينا تۋىنا ۇقساس كوپ جانە سارى جولاقتى شەكارا قازىعىن قورشاپ تۇرىپ پرەزيدەنت زەلەنسكيگە مالىمەت بەرىپ جاتقان ۋكراينالىق جاۋنگەرلەردىڭ ۆيدەو مالىمدەمەسى الەۋمەتتىك جەلىدە دە تەز تارادى. وندا ولار: «قۇرمەتتى پرەزيدەنت مىرزا، ءبىز جەتتىك، ءبىز شەكارادا تۇرمىز»، – دەپ مالىمدەيدى.

قازىرشە ۋكراينا قارۋلى كۇشتەرى حاركوۆ ايماعى مەن رەسەي شاكاراسىن تولىق تازارتقان-تازارتپاعانى تۋرالى انىق مالىمەت جوق. دەگەنمەن، شەكارا قازىعىنا دەيىن جەتىپ، پرەزيدەنتكە مالىمەت بەرۋ سوعىستاعى ماڭىزدى سيمۆولدىق ءمان الدى. بۇل ءبىر جاعىنان ۋكراينا ازاماتتارى ءۇشىن سوعىس جەڭىسىنە دەگەن ۇمىتتەرى مەن سەنىمدەرىن كۇشەيتتى دەسە دە بولادى.

حاركوۆ – ۋكراينانىڭ ەكىنشى ءىرى قالاسى. سوعىستىڭ باستاپقى كەزەڭىنەن تارتىپ رەسەي ارمياسى حاركوۆتى قورشاۋعا الدى، الايدا كۇشتى قارسىلىقتان قالاعا كىرە المادى. رەسەي كۇشتەرى قالانى باسىپ الا الماسا دا، ارتيللەريالىق، زىمىران جانە اۋە شابۋىلدارىمەن اياماي سوققى بەردى. سوعىستا ەڭ اۋىر زارداپ شەككەن قالالاردىڭ ءبىرى دە حاركوۆ بولدى، شاھارداعى الەۋمەتتىك ماڭىزى بار عيماراتتار دەرلىك سوققى نىساناسىنا الىندى.

ايتا كەتەيىك، امەريكالىق ISW ورتالىعى 13 مامىر كۇنى رەسەيلىك كۇشتەر حاركوۆتەن شەگىنۋگە شەشىم قابىلداپ جاتقانى تۋرالى بولجامداردى جاريا ەتكەن ەدى. زەرتتەۋ ورتالىعىنىڭ ەسەبىنشە، بۇنداي شەشىمگە ۋكراينالىق اسكەرلەردىڭ جەڭىستى كونتر-شابۋىلدارى مەن رەسەيلىك كۇشتەردىڭ قاجەتتى كومەكتى الا الماعانى سەبەپ بولعان.

The Qazaq Times