ۋكراينا مەن پولشا شەكاراسىندا كۋلەبا مەن بلينكەن كەزدەستى. فوتو: associated press

«سوعىس ءبىر اپتاعا، ءتىپتى ءبىر ايعا جالعاسسا دا ۋكراينانىڭ جەڭەتىنىنە سەنىمدىمىن». بۇنداي مالىمدەمەنى بۇگىن، 7 ناۋرىز كۇنى اقش مەملەكەتتىك حاتشىسى انتوني بلينكەن ليتۆاداعى ساپارى كەزىندە ورتاعا سالدى.

سەنبى كۇنى بريۋسسەلدە ەۋروپا ەلدەرىندەگى ارىپتەستەرىمەن كەزدەسۋدەن كەيىن اقش مەملەكەتتىك حاتشىسى مولدوۆا مەن  پولشاعا ساپارلادى. پولشا شەكاراسىندا ۋكراينانىڭ ءسىم باسشىسى كۋلەبامەن دە كەزدەستى. «رەيتەر» اگەنتتىگىنىڭ حابارىنا قاراعاندا، كەزدەسۋدە اقش پەن وزگە باتىس ەلدەرىنىڭ ۋكرايناعا بەرەتىن كومەگى، قارۋ-جاراق جەتكىزۋ ماسەلەلەرى، سونداي-اق، رەسەيدى وقشاۋلاۋ مەن كۇيرەتۋشى سانكتسيالار ماسەلەلەرى تالقىلانعان.

ال، كۋلەبا بولسا ۋكراينانىڭ سوعىستا جەڭەتىنىنە سەنىمدى ەكەنىن، الايدا سوعىستى تەزىرەك توقتاتۋ ءۇشىن وزگە الەمنىڭ قولداۋىنا مۇقتاجدىعىن جەتكىزگەن. بۇعان قوسا ۋكراينا ارمياسىنا ەڭ قاجەت بولىپ جاتقان ۇشاق جانە اۋە قورعانىس جۇيەلەرىنىڭ تەزىرەك بەرىلۋىن سۇراعان. كۋلەبا سوزىندە رەسەيمەن كەلىسسوزدەردىڭ ەشقانداي ناتيجە بەرمەگەنىن، بىراق «كەلىسسوزدى العا ىلگەرلەتۋ كەرەك ەكەنىن» ايتقان.

كۋلەبامەن كەزدەسۋدە بلينكەن: «مەنىڭ قازىر دوسىم ءارى ارىپتەسىم ۋكراينا ءسىم باسشىسىمەن بىرگە تۇرعانىمداي بۇكىل الەم دە ۋكراينمەن بىرگە تۇر»، – دەگەن مالىمدەمە جاساپتى.

بۇدان كەيىن بلينكەن بالتىق جاعالاۋىنداعى ەلدەرگە ساپارعا اتتاندى. بۇگىن ليتيۆا استاناسى ۆيلنيۋستە ەل پرەزيدەنتى گيتاناس ناۋسەدامەن كەزدەستى. بلينكەن كەزدەسۋدە رەسەي پرەزيدەنتى ءپۋتيننىڭ ارەكەتتەرى ۋكراينا شەكاراسىنان دا اسىپ كەتۋى، وزگە ەۋروپا ەلدەرىنىڭ شەكاراسىنا دا اياق باسۋى مۇمكىن ەكەنىن ەسكەرتكەن.

بلينكەن بۇل ساپارىندا قۇراما شتاتتاردىڭ رەسەيدىڭ اگرەسسيالىق ارەكەتتەرىنە قارسى ليتيۆا مەن ۋكراينا جاعىندا بولاتىنىن باسا ايتىپ وتكەن.

The Qazaq Times