كورنەكى سۋرەت. فوتو: Anadolu Agency

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى 1,5 مىڭعا ارتىپ، جالپى ەسەبى 1 ملن 26 مىڭعا جەتكەن. بۇل سالىستىرمالى تۇردە بىلتىرعىدان ايتارلىقتاي جوعارى. 

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 4 قاراشا كوروناۆيرۋس (كۆي+) جۇققان 1421 ادام، ال 3-ءى كوروناۆيرۋس پنەۆمونياسىنا (كۆي-) شالدىققان 120 ادام تىركەلدى. سونداي-اق، سارسەنبىدە 25 قازاقستاندىق اۋرۋدان قايتىس بولدى. بىلتىر ءدال وسى ۋاقىتتا رەسمي ستاتيستيكادا تاۋلىگىنە كوپ دەگەندە 700-گە دەيىن ناۋقاس جانە 5-6 ءولىم جاعدايى تىركەلەتىن، ستاتسيونارلاردا جاتقان سىرقاتتار سانى 4 مىڭ شاماسىندا ەدى. قازىر بۇل كورسەتكىش ەسەلەپ ءوسىپ وتىر، بۇگىندە ەلدە 42 مىڭ ادام (كۆي+ بويىنشا 37 مىڭ، كۆي- بويىنشا 5 مىڭ) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار سانى تاعى كوبەتسدى. ولاردىڭ نەگىزگى بولىگى نەمەسە 14%-ى ادەتتەگىدەي جوعارى ديناميكادا تۇرعان ءبىر عانا الماتى (198) قالاسىنا، 11%-ى سقو (163), 10%-ى پاۆلودار (143) وبلىسىنا تيەسىلى. اۋرۋشاڭدىق قاراعاندى (134), الماتى وبلىسى (130), اتىراۋ (22), قوستاناي (137), شقو (88), اقتوبە (48), تۇركىستان (31), جامبىل (21) وبلىستارىندا ارتقانى بايقالادى. ال استانا (104), اقمولا (109), بقو (47), شىمكەنت (23), قىزىلوردا (19), ماڭعىستاۋ (4) وڭىرلەرىندە  بىرشاما كەمىگەن. بەيسەنبىدە اۋرۋدان ايىققان 2113 ادام ۇيىنە شىعارىلعان. 3 قاراشادا جيىنى 23 ادام قايتىس بولعان.

#COVID_پنەۆمونياسى قاراشانىڭ 3-ءى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 120 ناۋقاس ەسەپكە الىندى. ۆەدومستۆو دەرەگىنشە, بۇل كۇنى شقو (27), الماتى وبلىسى (14), قاراعاندى (14), جامبىل (11), شىمكەنتتە (11) كوپتەپ انىقتالعان. سونىمەن قوسا، 170 ادام ايىعىپ شىققان، تاعى 2 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 42 مىڭ ناۋقاستىڭ 7 مىڭى اۋرۋحانادا، 35 مىڭى امبۋلاتورلىق باقىلاۋدا. 538 ناۋقاستىڭ جاعدايى ناشار، ونداعى 155 ادامنىڭ ءحالى وتە اۋىر. بۇدان وزگە 99 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا «جاسىل ايماقتاعى» شىمكەنت، اتىراۋ، تۇركىستان، ماڭعىستاۋ، بقو، الماتى وبلىسى، جامبىل، اقتوبە، قىزىلوردا وبلىستارىنان باسقا استانا، قاراعاندى، شقو، الماتى قالاسى «سارى ايماققا» وتكەن. باسقا 4 ايماق (قوستاناي، پاۆلودار، اقمولا، سقو) تۇتاستاي «قىزىل ايماقتا» تۇر.

دەنميننىڭ QT رەداكتسياسىنا بەرگەن مالىمەتىنشە، ىندەت تاراعان 2020-2021 جىلدارى پتر تەستى وڭ كورسەتكەن 1407 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق، ۇندىستاندىق جانە نيگەريالىق شتامدارى انىقتالعان.

بيىلعى جاز مەزگىلى قازاقستاندىقتار ءۇشىن قارالى حابارعا تولى بولدى. پاندەميا باستالعالى 1,5 جىلدىڭ ىشىندە انىقتالعان بارلىق اۋرۋشاڭدىق پەن ءولىم جاعدايىنىڭ جارتىسى تەك وتكەن جازدا، ءتورتىنشى تولقىندا تىركەلدى. جازعى ءۇش ايدا باس-اياعى 420 مىڭ ادام اۋىرسا، 6,6 مىڭنان اسا ادام كوز جۇمدى. قىركۇيەك ايىنىڭ وزىندە 99 مىڭداي ناۋقاس ەسەپكە الىنعان جانە 2117 ادام قايتىس بولعان. ال قازان ايىندا 57 مىڭ اۋرۋ جانە 1078 ءولىم جاعدايى تىركەلگەن.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 946 مىڭعا جۋىقتاسا، 1 تامىزدان بەرگى كوروناۆيرۋس پنەۆمونياسى 80 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 1 ملن 26 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميانىڭ باس-اياعى 20 ايىندا جالپى ۆيرۋس جۇققانداردان 20,6 مىڭ ادام (كۆي+ / U07.1 – 12 204, كۆي- / U07.2 – 5059, ىلەسپە اۋرۋلاردان – 3415) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 37-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 7,6 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 8,3 ملن-نان اسادى. دەنساۋلىق ساقتاۋ ءمينيسترى الەكسەي تسوي قاراشا ايىنىڭ ءۇشىنشى ونكۇندىگىنەن باستاپ ۆاكتسينا العانىنا جارتى جىل وتكەندەر ءۇشىن رەۆاكتسياناتسيا ناۋقانى جۇرگىزىلەتىنىن مالىمدەگەن.

The Qazaq Times