كوروناۆيرۋس ستاتسيونارىنىڭ ءدالىزى. بالالار قالالىق كلينيكالىق جۇقپالى اۋرۋلار اۋرۋحاناسىنىڭ ءمودۋلدى فيليالى. 21 قىركۇيەك 2021 جىل. الماتى قالاسى. فوتو: QT / كۇلتەگىن اسپانۇلى

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى 1,7 مىڭعا ارتىپ، جالپى ەسەبى 982 مىڭنان اسقان. قازان ايىنىڭ العاشقى ونكۇندىگىندە 20 مىڭعا جۋىق ناۋقاس انىقتالىپ، 376 ادام كوز جۇمعان. بۇل سالىستىرمالى تۇردە بىلتىرعىدان ايتارلىقتاي جوعارى. پتر تەستى ارقىلى كوروناۆيرۋس جۇققانى راستالعان سىرقاتتار قاتارى 900 مىڭنان استى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 10 قازاندا كوروناۆيرۋس (كۆي+) جۇققان 1717 ادام، ال 9-ى كۇنى  كوروناۆيرۋس پنەۆمونياسىنا (كۆي-) شالدىققان 42 ادام تىركەلدى. سونداي-اق، وتكەن سەنبىدە 33 قازاقستاندىق اۋرۋدان قايتىس بولدى. وسىلايشا وسى اپتاداعى جاعداي ماۋسىم ايىنىڭ سوڭىنداعى دەڭگەيگە شامالاس كورىنەدى. دەگەنمەن بىلتىر ءدال وسى ۋاقىتتا رەسمي ستاتيستيكادا تاۋلىگىنە كوپ دەگەندە 300-گە دەيىن ناۋقاس جانە 10-عا جەتەر-جەتپەس ءولىم جاعدايى تىركەلەتىن، ستاتسيونارلاردا جاتقان سىرقاتتار سانى 3,5 مىڭنان اسپاعان ەدى. قازىر بۇل كورسەتكىش ەسەلەپ ءوسىپ وتىر، بۇگىندە ەلدە 54 مىڭعا تارتا ادام (كۆي+ بويىنشا 46 مىڭ، كۆي- بويىنشا 7 مىڭ) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى نەمەسە 25%-ى ادەتتەگىدەي جوعارى ديناميكادا تۇرعان ءبىر عانا الماتى (326) قالاسىنا تيەسىلى. ال استانا (280), قاراعاندى (149), الماتى (120), پاۆلودار (163), قوستاناي (96), شقو (99), سقو (141), اقمولا (112), بقو (45), جامبىل (16), اقتوبە (46), شىمكەنت (28), تۇركىستان (29), اتىراۋ (39), قىزىلوردا (14), ماڭعىستاۋ (14) وڭىرلەرىندە ءبىرشاما تۇراقتى. جەكسەنبىدە اۋرۋدان ايىققان 1444 ادام ۇيىنە شىعارىلعان. 9 قازاندا جيىنى 29 ادام قايتىس بولعان.

#COVID_پنەۆمونياسى مەحانيكالىق ادىسپەن ەسەپكە الىناتىندىقتان، دەمالىس كۇندەرى مەدستاتيستيكا جۇيەسى تولىق قامتىلمايدى. سالدارىنان كەيستەر قاتارى سەنبى جانە جەكسەنبى، مەرەكە كۇندەرى ادەتتەگىدەن ايتارلىقتاي از تىركەلەدى. قازاننىڭ 9-ى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 42 ناۋقاس ەسەپكە الىندى. ۆەدومستۆو دەرەگىنشە, بۇل كۇنى استانا (11), الماتى وبلىسى (8), شىمكەنت (7), شقو-دا (4) سىرقاتتار كوپتەپ انىقتالعان. سونىمەن قوسا، 112 ادام ايىعىپ شىققان، تاعى 4 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 54 مىڭداي ناۋقاستىڭ 9,5 مىڭى اۋرۋحانادا، 44 مىڭى امبۋلاتورلىق باقىلاۋدا. 696 ناۋقاستىڭ جاعدايى ناشار، ونداعى 194 ادامنىڭ ءحالى وتە اۋىر. بۇدان وزگە 127 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا «جاسىل ايماقتاعى» شىمكەنت، تۇركىستان، ماڭعىستاۋ، اتىراۋ، قىزىلوردا جانە جامبىل وبلىستارىنان باسقا اقتوبە، قوستاناي، قاراعاندى، بقو، شقو، اقمولا، الماتى وبلىستارى «سارى ايماققا» وتكەن. باسقا 5 ايماق تۇتاستاي «قىزىل ايماقتا» تۇر.

دەنميننىڭ QT رەداكتسياسىنا بەرگەن مالىمەتىنشە، ىندەت تاراعان 2020-2021 جىلدارى پتر تەستى وڭ كورسەتكەن 1407 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق، ۇندىستاندىق جانە نيگەريالىق شتامدارى انىقتالعان.

بيىلعى جاز مەزگىلى قازاقستاندىقتار ءۇشىن قارالى حابارعا تولى بولدى. پاندەميا باستالعالى 1,5 جىلدىڭ ىشىندە انىقتالعان بارلىق اۋرۋشاڭدىق پەن ءولىم جاعدايىنىڭ جارتىسى تەك وتكەن جازدا، ءتورتىنشى تولقىندا تىركەلدى. جازعى ءۇش ايدا باس-اياعى 420 مىڭ ادام اۋىرسا، 6,6 مىڭنان اسا ادام كوز جۇمدى. قىركۇيەك ايىنىڭ وزىندە 99 مىڭداي ناۋقاس ەسەپكە الىنعان جانە 2117 ادام قايتىس بولعان. ال قازان ايىنىڭ ءبىرىنشى دەكاداسىندا 20 مىڭعا جۋىق اۋرۋ جانە 400-گە تارتا ءولىم جاعدايى تىركەلگەن.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 905 مىڭنان، 1 تامىزدان بەرگى كوروناۆيرۋس پنەۆمونياسى 77 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 983 مىڭعا جۋىقتاعان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 19,5 مىڭ ادام (كۆي+ / U07.1 – 11 559, كۆي- / U07.2 – 4914, ىلەسپە اۋرۋلاردان – 3123) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 36-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 6,9 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 7,8 ملن-نان اسادى.

The Qazaq Times