استانانىڭ اكىمشىلىك سوتى رەسەيلىك «سبەر» كومپانيالار توبىمەن مەموراندۋم جاساسقان پرەمەر-مينيستر اسقار ءماميندى سوتقا بەرگەن بەلسەندىنىڭ شاعىمىن كەرى قايتاردى.

بۇل جونىندە 17 قىركۇيەكتە ازاماتتىق بەلسەندى ساناۆار زاكيروۆا Facebook جەلىسىندەگى پاراقشاسىندا حابارلادى.

«مەموراندۋم اكىمشىلىك اكت ەمەس – تاراپتاردىڭ ارىپتەستىك جايلى كەلىسىمى، قوعامدىق-قۇقىقتىق ەمەس، رەكومەنداتسيالىق سيپاتقا يە. اتالعان مەموراندۋمعا قول قويۋ اكىمشىلىك ارەكەت بولىپ سانالمايدى» دەلىنگەن سۋديا قۇرانبەك بەيسەنبىدە شىعارعان شەشىمدە. سونىمەن قوسا، شاعىمدى اكىمشىلىك ءوندىرىس تارتىبىندە قاراۋعا كەلمەيتىنى جازىلعان.

بەلسەندى زاكيروۆا QT رەداكتسياسىنا اپەللياتسيالىق سوتقا شاعىم تۇسىرەتىنىن حابارلادى. ول وسى اپتانىڭ باسىندا قازاقستان ۇكىمەتىنىڭ باسشىسى مامين مەن جارتىسىنا رەسەي بيلىگى يەلىك ەتەتىن «سبەر» كومپانياسى باسشىلىعى جاساسقان كەلىسىمدى سىناپ، ونىڭ «كونستيتۋتسياعا  قايشى جانە قازاقستان ازاماتتارىنا قاۋىپ توندىرەتىنىن» ايتىپ سوتقا شاعىم جازعان ەدى.

3 قىركۇيەكتە قازاقستان ۇكىمەتى رەسەيلىك «سبەر» كومپانيالار توبىمەن قازاقستاننىڭ تسيفرلىق ۇكىمەتىنە ارنالعان پلاتفورما قۇرۋ جونىندە مەموراندۋمعا ازاماتتىق قوعام كەلىسىمىنسىز قول قويعان.

The Qazaq Times