الماتى قالاسىندا 11 مىڭعا جۋىق ادام كوروناۆيرۋستان ەمدەلىپ جاتىر

الماتىدا كوروناۆيرۋس پاندەمياسىنىڭ ءتورتىنشى تولقىنى اقىرىنداپ باسەڭدەپ كەلەدى. تاپ قازىر قالانىڭ 10,8 مىڭ تۇرعىنى ەمدەلىپ جاتىر. قازىر رەزەرۆتەگى توسەك-ورىنداردى قوسا ەسەپتەگەندە ستاتسيونارلاردا شامامەن 45% ورىن تولعان. 

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 9 قىركۇيەكتە تىركەلگەن 931 ادامنىڭ 894-ءى سيمپتوم بەلگىلەرىمەن، تاعى 37 ادام سيمپتومسىز تىركەلگەن. بەيسەنبى كۇنى 312 ادام اۋرۋحاناعا جاتقىزىلعان.

جالپى قالادا سىيىمدىلىعى 7740 ورىن بولاتىن ينفەكتسيالىق ستاتسيونارلاردا 3502 ادام ەمدەلىپ جاتىر. ولاردىڭ اراسىندا 108 بالا توسەككە تاڭىلعان. ال رەانيماتسيا جانە قارقىندى تەراپيا بولىمدەرىندە 310 ناۋقاس جاتىر. 46 ادام ءوجج، 122 ناۋقاس ءينۆازيۆتى ەمەس ءوجج-ىمەن جانە 126 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 7312 ناۋقاس امبۋلاتورلىق دەڭگەيدە باقىلاۋعا الىنعان.

اپتا باستالعالى جيىنى 73 ادام كوروناۆيرۋس پەن وعان ۇقساس پنەۆمونيادان قايتىس بولعان.

رەسمي دەرەككە قاراعاندا، الماتى قالاسىندا بيىل اقپاننان بەرى 903 مىڭ ادام ەكپەنىڭ العاشقى، ونىڭ ىشىندە 785 مىڭى تولىق دوزاسىن العان. اكىمدىك مالىمەتىنشە، ازىرگە 160 ەگۋ پۋنكتى مەن 237 ەگۋ بريگاداسىندا 1028 مەدقىزمەتكەر جۇمىس ىستەيدى.

ەپيدكارتادا بىرنەشە ايدان بەرى «قىزىل ايماقتا» تۇرعان الماتى قالاسىندا پاندەميا باستالعالى 163 مىڭنان اسا ادام اۋىرعان، ونىڭ 50 مىڭعا جۋىعى تامىزدا انىقتالعان. قازىر رەسپۋبليكادا انىقتالعان كۇندەلىكتى ەسەپتىڭ شيرەك بولىگى الماتى قالاسىنا تيەسىلى بولىپ وتىر.

ەپيداحۋالدىڭ ناشارلاۋىنا بايلانىستى قالىپتى جاعدايدا قولدانىلىپ جۇرگەن 7011 توسەك-ورىن 8910-عا دەيىن كوبەيتىلگەن. ستاتسيونارلارداعى ورىن سانى ارتىپ، ءتىپتى جاڭا رەزەرۆتىك فيليالدار ۋاقىتشا ىسكە قوسىلعان ەدى. سەيسەنبى بۇل 7740 ورىنعا دەيىن قىسقارتىلدى.

The Qazaq Times