كوۆيدتەن ەمدەلىپ جاتقان سىرقاتتاردىڭ پالاتاسى. كورنەكى سۋرەت. فوتو: اشىق دەرەكوز

الماتىدا كوروناۆيرۋس پاندەمياسىنىڭ ءتورتىنشى تولقىنى ءالى باسەڭدەمەي تۇر. تاپ قازىر قالانىڭ 18 مىڭ تۇرعىنى ەمدەلىپ جاتىر. قازىر رەزەرۆتەگى توسەك-ورىنداردى قوسا ەسەپتەگەندە ستاتسيونارلاردا شامامەن 66% ورىن تولعان.

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 25 تامىزدا تىركەلگەن 1605 ادامنىڭ 1512-ءسى سيمپتوم بەلگىلەرىمەن، تاعى 93 ادام سيمپتومسىز تىركەلگەن. سارسەنبى كۇنى 578 ادام اۋرۋحاناعا جاتقىزىلعان. بۇل وزگە ايلارداعى كورسەتكىشتەن الدەقايدا جوعارى.

جالپى قالادا سىيىمدىلىعى 8910 ورىن بولاتىن ينفەكتسيالىق ستاتسيونارلاردا 5871 ادام ەمدەلىپ جاتىر. ولاردىڭ اراسىندا 174 بالا توسەككە تاڭىلعان. ال رەانيماتسيا جانە قارقىندى تەراپيا بولىمدەرىندە 461 ناۋقاس جاتىر. 26 ادام ءوجج، 192 ناۋقاس ءينۆازيۆتى ەمەس ءوجج-ىمەن جانە 204 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 12 824 ناۋقاس امبۋلاتورلىق دەڭگەيدە باقىلاۋعا الىنعان.

دۇيسەنبى جانە سەيسەنبى كۇندەرى جيىنى 56 ادام كوروناۆيرۋس پەن وعان ۇقساس پنەۆمونيادان قايتىس بولعان.

رەسمي دەرەككە قاراعاندا، الماتى قالاسىندا بيىل اقپاننان بەرى 853 مىڭ ادام ەكپەنىڭ العاشقى، ونىڭ ىشىندە 699 مىڭى تولىق دوزاسىن العان. اكىمدىك مالىمەتىنشە، ازىرگە 160 ەگۋ پۋنكتى مەن 237 ەگۋ بريگاداسىندا 1028 مەدقىزمەتكەر جۇمىس ىستەيدى. جالپى پاندەميا باستالعالى قالادا 144 مىڭنان اسا ادام اۋىرعان، ونىڭ 35 مىڭنان استامى وسى تامىزدا انىقتالعان.

ەپيداحۋالدىڭ ناشارلاۋىنا بايلانىستى قالىپتى جاعدايدا قولدانىلىپ جۇرگەن 7011 توسەك-ورىن 8910-عا دەيىن كوبەيتىلگەن. ستاتسيونارلارداعى ورىن سانى ارتىپ، ءتىپتى جاڭا رەزەرۆتىك فيليالدار ۋاقىتشا ىسكە قوسىلعان.

جۇمىس كۇندەرى كۇشەيگەن شەكتەۋمەن ىستەپ، دەمالىس كۇندەرى جۇمىسىن توقتاتىن ءتۇرلى ۇيىم-مەكەمەلەرگە قاتىستى كارانتين رەجيمى 1 قىركۇيەككە دەيىن ۇزاردى.

وسىعان دەيىن باس سانيتار دارىگەر جانداربەك بەكشين ءبىر كۇندە اۋرۋحاناعا جاتقىزىلعاندار سانى 500-دەن اسسا، قالادا لوكداۋن كۇشەيتىلىپ، بلوك-بەكەت قويىلاتىنى تۋرالى ناۋرىز ايىنداعى كريتەريدىڭ قازىر كۇشىن جويعانىن مالىمدەگەن.

بەكشيننىڭ بولجاۋىنشا, شىلدە ايىندا باستالعان ءتورتىنشى تولقىننىڭ شارىقتاۋ شەگى 11-12 تامىز كۇندەرى ءوتۋى كەرەك بولعان. دەگەنمەن ءالى دە الماتى قالاسى رەسپۋبليكاداعى ەڭ ۇلكەن ىندەت وشاعى رەتىندە تاۋلىگىنە 1,5 مىڭنان ارتىق جاعداي تىركەلىپ جاتىر.

The Qazaq Times