تۇركيا پوليتسياسى سوڭعى ەكى كۇندە يرانمەن شەكارالاس اۋماقتان جۇزدەن استام ميگرانتتى ۇستادى.

ىشكى ىستەر مينيسترلىگىنىڭ مالىمدەۋىنشە، بوسقىنداردىڭ باسىم بولىگى اۋعاندار. تۇركيا بيلىگى الداعى ۋاقىتتا اۋعانستانداعى قارۋلى قاقتىعىستاردان باس ساۋعالاپ قاشقاندار قاراسى كوبەيۋى مۇمكىن دەيدى.

وتكەن ايدا تۇركيا، اۋعانستان جانە يران سىرتقى ىستەر مينيسترلەرى باس قوسىپ، كوشى-قون سالاسىندا ارىپتەستىك ورناتۋ ماسەلەسىن تالقىلاعان. حالىقارالىق كواليتسيا كۇشتەرى اۋعانستاننان شىعارىلا باستاعالى بەرى ميگرانتتار كوشى ارتتى.

بىرىككەن ۇلتتار ۇيىمىنىڭ مالىمەتىنشە، اۋعانستاندا بيىل جىل باستالعالى تالىپتەردىڭ ۇكىمەت قولىنداعى ايماقتارعا شابۋىلدارىنىڭ كۇشەيۋىنەن 270 مىڭنان اسا تۇرعىن باسپاناسىن تاستاپ كەتكەن. ەل ىشىندە بوسقان حالىقتىڭ سانى 3,5 ميلليوننان اسقان.

8 شىلدەدە اقش پرەزيدەنتى دجو بايدەن امەريكالىق اسكەريلەردىڭ اۋعانستاننان 31 تامىزدا تولىق شىعاتىنىن مالىمدەدى. ول «اۋعانستان ءوز بولاشاعىن وزدەرى قۇرۋ كەرەك» دەدى. شىلدەنىڭ باسىندا ۋاشينگتون باگرام اۋە بازاسىنداعى اسكەريلەرىن اكەتىپ، اقش تاريحىنداعى ەڭ ۇزاققا سوزىلعان (20 جىل) سوعىستى اياقتاۋعا ۇلكەن قادام جاسادى. باگرام اقش-تىڭ اۋعانستانداعى اسكەري ارەكەتىنىڭ نەگىزگى بازاسى بولعان. پەنتاگون اۋعانستانداعى اسكەرىنىڭ 95%-ى شىعارىلعانىن مالىمدەدى.

تالىپتەر كۇش الا باستاعان تۇستا اقش وزبەكستان، قازاقستان، تاجىكستاننان «امەريكالىق اسكەريلەرگە كومەكتەسكەن 9 مىڭ اۋعاندى ۋاقىتشا ورنالاستىرۋدى» سۇرادى. اقش تالىپتەر امەريكالىق اسكەريلەرگە كومەكتەسكەن اۋعانداردى جازالاۋى مۇمكىن دەپ قاۋىپتەنەدى. ۋاشينگتون قازىر 9 مىڭ اۋعاندى اۋعانستاننان اكەتۋدىڭ بارلىق جولىن قاراستىرىپ جاتىر.

"The Qazaq Times"