تۇركيا يرانمەن شەكارانى جاپتى

تۇركيا بيلىگى كوروناۆيرۋس ىندەتىنىڭ ارتۋىنا بايلانىستى يرانمەن شەكارانى جاپتى، – دەپ حابارلايدى ەلدىڭ دەنساۋلىق ساقتاۋ مينيسترلىگى.

بۇل ماسەلە جونىندە تۇركيا دەنساۋلىق ساقتاۋ ءمينيسترى فاحرەتتين كوجا: يرانداعى كوروناۆيرۋستى جۇقتىرعاندار سانىنىڭ ارتۋىنا بايلانىستى كورشىلەس ەلمەن شەكارامىزدى جابۋ جونىندە شەشىم قابىلدادىق. جاعدايعا قاتىستى سىرتقى ىستەر، ۇلتتىق قورعانىس، ىشكى ىستەر، كولىك، ساۋدا جانە باسقا دا ءتيىستى مينيسترلىكتەرمەن قاجەتتى شارالاردى قابىلدادىق. سونداي-اق بۇعان دەيىن يراننان كەلگەن بارلىق جولاۋشىلاردىڭ مەديتسينالىق ساراپتامالاردان وتكەندىگىن جەتكىزگىم كەلەدى»، – دەيدى.

ەكى ەل اراسىنداعى گۇربۋلاك، كاپىكوي مەن ەسەندەرە وتكىزۋ بەكەتتەرى بەلگىسىز مەرزىمگە دەيىن ءوز جۇمىسىن توقتاتتى. سونداي-اق تەمىرجول مەن يراننان كەلەتىن ۇشاق ساپارلارى كەشە تۇنگى 23:00-دەن باستاپ قاتىنامايتىن بولدى. الايدا، تۇركيادان يرانعا اۋە ساپارلارى جالعاسادى.

يراندا جاڭا ءتيپتى كوروناۆيرۋستى 43 ادامنىڭ جۇقتىرعانى انىقتالسا، قاتەرلى ۆيرۋس سالدارىنان قازا تاپقانداردىڭ سانى سەگىزگە جەتتى. رەسمي مالىمەتتەر بويىنشا، يران قىتايدان كەيىن كوروناۆيرۋس دەرتىنەن ەڭ كوپ جاپا شەككەن ەل قاتارىنا ەنگەن. ال تۇركيادا بۇگىنگە دەيىن جۇقپالى ىندەتپەن اۋىرعاندار تىركەلگەن جوق.

"The Qazaq Times"