تاجىكستان اۋعانستاننان تونگەن قاۋىپ-قاتەردىڭ الدىن الىپ، وڭتۇستىك شەكارالارىن قورعاۋ ءۇشىن ۇجىمدىق قاۋىپسىزدىك شارت ۇيىمىنان كومەك سۇرادى. 

بۇعان دەيىن اۋعانستاننىڭ سولتۇستىك اۋداندارىندا ۇكىمەت اسكەرى تالىپتەرمەن قاقتىعىسقا ءتۇسىپ، 1,5 مىڭداي جاۋىنگەر تاجىكستان اۋماعىنا قاشىپ وتكەن. احۋال ۋشىققاننان كەيىن رەسمي دۋشانبە ۇجىمدىق قاۋىپسىزدىك شارت ۇيىمىنان شۇعىل ارەكەت ەتۋدى تالاپ ەتىپ وتىر. دۋشانبە اۋعانستانمەن شەكارانى كۇشەيتۋ ءۇشىن رەزەرۆتەگى 20 مىڭ ازاماتتى اسكەرگە شاقىردى. سونىمەن قاتار تالىپتەر تاجىك-اۋعان شەكاراسىنىڭ بويىندا مىڭ شاقىرىمعا جۋىق اۋماقتى باقىلاپ وتىر.

وسى ماسەلەگە بايلانىستى مالىمدەمە جاساعان رەسەي سىرتقى ىستەر ءمينيسترى سەرگەي لاۆروۆ: «اۋعانستانداعى جاعدايدى ءجىتى باقىلاپ وتىرمىز. ەلدەگى احۋال كۇرت ناشارلاپ كەتۋى مۇمكىن دەگەن قاۋىپ بار. بۇعان اقش پەن ناتو اسكەرىنىڭ اۋعان جەرىنەن كەتۋى اسەر ەتىپ وتىر. ونداعان جىلدار بويى سوعىسقان شەتەل اسكەرلەرى اۋعانستانداعى جاعدايدى تۇراقتاندىرۋ بويىنشا ايتارلىقتاي ناتيجەگە قول جەتكىزە المادى. ءبىز تاجىكستان مەن اۋعانستان شەكاراسىنداعى رەسەي بازاسىنىڭ الەۋەتىن پايدالانا وتىرىپ، وداقتاستارعا جاسالاتىن كەز كەلگەن اگرەسسيالىق ارەكەتتەرگە تويتارىس بەرۋ ءۇشىن قولدان كەلگەننىڭ ءبارىن جاساۋعا دايىنبىز»، – دەدى.

20 جىلدان بەرى اۋعانستاندا تەرروريستەرگە قارسى كۇرەسىپ كەلگەن اقش باستاعان كواليتسيالىق كۇشتەر مامىر ايىنان باستاپ اسكەرلەرىن شىعارىپ جاتىر. قۇراما شتاتتار بيلىگى 11 قىركۇيەككە دەيىن اسكەرىن اۋعانستاننان تولىق شىعاراتىنىن جاريالاعان.

1 شىلدە اقش مەملەكەتتىك حاتشىسى ەنتوني بلينكەن ۆاشينگتوندا وزبەكستان مەن تاجىكستان سىرتقى ىستەر مينيسترلەرىمەن كەزدەسىپ، اۋعان تاقىرىبىن تالقىلادى. وسىلايشا، اقش اۋعانستاننان اسكەرىن شىعارىپ جاتقان تۇستا ۋاشينگتون ورتالىق ازيادان ستراتەگيالىق ارىپتەس ىزدەۋگە كوشتى.

5 شىلدە تاجىكستان ءوز شەكاراسىن 1500-دەن استام اۋعان اسكەرى كەسىپ وتكەنىن حابارلادى. ولار تالىپتەرمەن قاقتىعىس كەزىندە شەگىنىپ، تاجىك اۋماعىنا قاراي وتۋگە ءماجبۇر بولعان. رەسمي دەرەككە قاراعاندا، تالىپتەر وسى ەلدەگى 400-گە جۋىق اۋدانىنىڭ 160-تان استامىن باقىلاۋىنا العان.

"The Qazaq Times"