قىرعىزستاننىڭ ەكس-پرەمەرى بابانوۆ جەمقورلىق كۇدىگىمەن ۇستالدى

قىرعىزستاننىڭ بۇرىنعى پرەمەر-ءمينيسترى ومىربەك بابانوۆ «قۇمتءور» التىن كەنىشىنە قاتىستى جوبانى جءۇزەگە اسىرۋ كەزىندەگى جەمقورلىق فاكتىسى بويىنشا ۇستالدى. بۇل تۋرالى رەسپۋبليكانىڭ ۇلتتىق قاۋىپسىزدىك كوميتەتىنىڭ (ۇقك) ءباسپاسوز قىزمەتى حابارلادى.

17 مامىردا ۇقك رەسپۋبليكاداعى قۇمتور كەن ورنىن يگەرۋمەن اينالىساتىن «كۋمتور گولد كومپاني» كومپانياسىنىڭ وكىلدەرىنە قاتىستى 4 قىلمىستىق ءىس قوزعادى. كۇدىكتىلەر جەر مەن اتموسفەرانىڭ لاستانۋى، مۇزدىقتاردىڭ بۇزىلۋى، سونداي-اق سالىق جانە ساقتاندىرۋ زاڭناماسىنا بايلانىستى زاڭ بۇزۋشىلىقتار فاكتىلەرى بويىنشا تەرگەلىپ جاتىر.

2011-2012 جىلدارى قىرعىزستان پرەمەرى بولعان بابانوۆ 2017 جىلى پرەزيدەنت سايلاۋىنا قاتىسىپ، ەكىنشى ورىن العان. سايلاۋدان سوڭ ول ساياسي كارەراسىن اياقتايتىنىن ايتىپ، ماسكەۋگە كەتكەن ەدى. 2019 جىلى تامىزدا ول قىرعىزستانعا ورالعان.

قۇمتور التىن كەن ورنى 1978 جىلى اشىلدى، بىراق ونىڭ قۇرىلىسى 90-جىلدارىنىڭ باسىندا عانا باستالدى. بۇعان قىرعىز ۇكىمەتىمەن كەلىسىمگە قول قويعان كانادالىق كورپوراتسيالاردىڭ ءبىرى قاتىستى. وسى قۇجات نەگىزىندە اكتسيالارىنىڭ ءبىر بولىگى قىرعىزستانعا بەرىلگەن جەكە كاسىپورىن قۇرىلدى. كەيىننەن كەلىسىمنىڭ ۇلەستىك بولىگىن تاراپتار بىرنەشە رەت قايتا قارادى.

قازىرگى ۋاقىتتا قۇمتور كەن ورنى ءىشىنارا كانادالىق «تسەنتەررا گولد ينك» كورپوراتسياسىنا تيەسىلى «كۋمتور گولد» كومپانياسىنا تيەسىلى. ونىڭ اكتسيالارى تورونتو قور بيرجاسىندا جانە نيۋ-يورك قور بيرجاسىندا ساۋدالانادى. قىرعىز تاراپى كەن ورنىنىڭ ەڭ ءىرى اكتسيونەرى سانالادى.

قىرعىزستاننىڭ سولتۇستىك-شىعىس بولىگىندە تەڭىز دەڭگەيىنەن 4 مىڭ مەتر بيىكتىكتە ورنالاسقان قۇمتور – پەرۋ ياناكوچا كەنىشىنەن كەيىنگى الەمدەگى ەكىنشى بيىك تاۋلى التىن كەن ورنى. وتكەن جىلى مۇندا 17 توننادان استام التىن ءوندىرىلدى.

مامىردا قىرعىز پارلامەنتى ەلدە جۇمىس ىستەيتىن كونتسەسسيالىق كاسىپورىندارعا سىرتقى باسقارۋدى ەنگىزۋگە مۇمكىندىك بەرەتىن زاڭ قابىلدادى. 17 مامىردا پارلامەنت كەنىشتە ۋاقىتشا سىرتقى باسقارۋدى ەنگىزۋ تۋرالى شەشىمگە كەلدى.

"The Qazaq Times"