Алмазбек Атамбаев және Өмірбек Бабанов. Фото: elet.media

Қырғызстанның бұрынғы премьер-министрі Өмірбек Бабанов «Құмтөр» алтын кенішіне қатысты жобаны жүзеге асыру кезіндегі жемқорлық фактісі бойынша ұсталды. Бұл туралы Республиканың Ұлттық қауіпсіздік комитетінің (ҰҚК) баспасөз қызметі хабарлады.

17 мамырда ҰҚК республикадағы Құмтөр кен орнын игерумен айналысатын «Кумтор голд компани» компаниясының өкілдеріне қатысты 4 қылмыстық іс қозғады. Күдіктілер жер мен атмосфераның ластануы, мұздықтардың бұзылуы, сондай-ақ салық және сақтандыру заңнамасына байланысты заң бұзушылықтар фактілері бойынша тергеліп жатыр.

2011-2012 жылдары Қырғызстан премьері болған Бабанов 2017 жылы президент сайлауына қатысып, екінші орын алған. Сайлаудан соң ол саяси карьерасын аяқтайтынын айтып, Мәскеуге кеткен еді. 2019 жылы тамызда ол Қырғызстанға оралған.

Құмтөр алтын кен орны 1978 жылы ашылды, бірақ оның құрылысы 90-жылдарының басында ғана басталды. Бұған қырғыз үкіметімен келісімге қол қойған канадалық корпорациялардың бірі қатысты. Осы құжат негізінде акцияларының бір бөлігі Қырғызстанға берілген жеке кәсіпорын құрылды. Кейіннен келісімнің үлестік бөлігін тараптар бірнеше рет қайта қарады.

Қазіргі уақытта Құмтөр кен орны ішінара канадалық «Центерра голд инк» корпорациясына тиесілі «Кумтор голд» компаниясына тиесілі. Оның акциялары Торонто қор биржасында және Нью-Йорк қор биржасында саудаланады. Қырғыз тарапы кен орнының ең ірі акционері саналады.

Қырғызстанның солтүстік-шығыс бөлігінде теңіз деңгейінен 4 мың метр биіктікте орналасқан Құмтөр – Перу Янакоча кенішінен кейінгі әлемдегі екінші биік таулы алтын кен орны. Өткен жылы мұнда 17 тоннадан астам алтын өндірілді.

Мамырда қырғыз парламенті елде жұмыс істейтін концессиялық кәсіпорындарға сыртқы басқаруды енгізуге мүмкіндік беретін заң қабылдады. 17 мамырда парламент кеніште уақытша сыртқы басқаруды енгізу туралы шешімге келді.

"The Qazaq Times"