قىرعىزستاندا كەزىندە جوعارى لاۋازىمدا بولعان بىرقاتار شەنەۋنىك قاماۋعا الىندى. قۇمتور ءىسى بويىنشا قامالعانداردىڭ قاتارىندا ەلدىڭ بۇرىنعى پرەمەر-ءمينيسترى ومىربەك بابانوۆ، پارلامەنتتىڭ بۇرىنعى سپيكەرى اسىلبەك جەەەنبەكوۆ، جوعارعى كەڭەستىڭ بۇرىنعى دەپۋتاتتارى يسحاك پيرماتوۆ پەن تالانت ۋزاكباەۆ بار.

ولار التىن وندىرەتىن «كۋمتور» كەن ورنىمەن جەمقورلىق قاتىناستا بولعان دەگەن كۇدىككە ىلىنگەن. كورشى ەلدىڭ ارنايى قىزمەتتەرى ەگەر الاياقتىققا قاتىسى دالەلدەنسە، ءتىپتى بۇرىنعى پرەزيدەنتتەردى دە جاۋاپكەرشىلىككە تارتۋعا دايىن.

قىرعىزستاننىڭ ۇلتتىق قاۋىپسىزدىك بويىنشا مەملەكەتتىك كوميتەتىنىڭ توراعاسى قامشىبەك تاشيەۆ: «قاجەت بولسا، بۇرىنعى پرەزيدەنتتەردى دە جاۋاپكەرشىلىككە تارتامىز. مۇنىڭ ەش ساياسي استارى جوق، كەزىندە بۇل كىسىلەر جوعارى لاۋازىمددىق مەملەكەتتىك قىزمەت اتقارعان جانە «كۋمتوردا» نە بولىپ جاتقانىن بىلگەن»، – دەيدى.

ۇلتتىق قاۋىپسىزدىك كوميتەتىنىڭ مالىمەتىنشە، قازىر «كۋمتور گولد كومپانيگە» قاتىستى 4 قىلمىستىق ءىس قوزعالدى. بىرەۋى بويىنشا تاعى ءبىر بۇرىنعى پرەمەر-مينيستر مۋحاممەدكالىي ابىلگازيەۆ قاماۋعا الىنعان. ول ىستىقكول وبلىسىندا كانادالىق كومپانياعا جەر مەن تابيعي قورلاردى ءبولۋ ءبولۋ تۋرالى شەشىم قابىلداعان بولاتىن. ال قازىر جەردىڭ ءبىر بولىگى زاڭسىز بولىنگەنى انىقتالدى.

2011-2012 جىلدارى قىرعىزستان پرەمەرى بولعان بابانوۆ 2017 جىلى پرەزيدەنت سايلاۋىنا قاتىسىپ، ەكىنشى ورىن العان. سايلاۋدان سوڭ ول ساياسي كارەراسىن اياقتايتىنىن ايتىپ، ماسكەۋگە كەتكەن ەدى. 2019 جىلى تامىزدا ول قىرعىزستانعا ورالعان.

قۇمتور التىن كەن ورنى 1978 جىلى اشىلدى، بىراق ونىڭ قۇرىلىسى 90-جىلدارىنىڭ باسىندا عانا باستالدى. بۇعان قىرعىز ۇكىمەتىمەن كەلىسىمگە قول قويعان كانادالىق كورپوراتسيالاردىڭ ءبىرى قاتىستى. وسى قۇجات نەگىزىندە اكتسيالارىنىڭ ءبىر بولىگى قىرعىزستانعا بەرىلگەن جەكە كاسىپورىن قۇرىلدى. كەيىننەن كەلىسىمنىڭ ۇلەستىك بولىگىن تاراپتار بىرنەشە رەت قايتا قارادى.

مامىردا قىرعىز پارلامەنتى ەلدە جۇمىس ىستەيتىن كونتسەسسيالىق كاسىپورىندارعا سىرتقى باسقارۋدى ەنگىزۋگە مۇمكىندىك بەرەتىن زاڭ قابىلدادى. 17 مامىردا پارلامەنت كەنىشتە ۋاقىتشا سىرتقى باسقارۋدى ەنگىزۋ تۋرالى شەشىمگە كەلدى.

"The Qazaq Times"