فوتو: https://www.pnp

قىرعىزستان قورعانىس مينيسترلىگىنىڭ جاۋىنگەرلىك ينجەنەرلەرى تاجىكستانمەن شەكارادا ورنالاسقان ۋچاسكەلەردە جۇمىس باستاپ، جارىلماعان سناريادتاردى زالالسىزداندىردى.

قىرعىز مەملەكەتتىك ۇلتتىق قاۋىپسىزدىك كوميتەتىنىڭ شەكارا قىزمەتى: «باتكەن اۋدانىنىڭ ورتو-بوز جەرىندە قىرعىز رەسپۋبليكاسى قورعانىس مينيسترلىگىنىڭ بۇرىن جارىلماعان سناريادتاردى زالالسىزداندىرۋ ءۇشىن ساپەرلەر توبى جۇمىس ىستەيدى. مەملەكەتتىك شەكارانىڭ قىرعىز-تاجىك ۋچاسكەسىندەگى جاعداي تۇراقتى. وتكەن تۇندە وقىس وقيعالار مەن اتىس تىركەلمەگەن. باتكەن وبلىسىندا ورنالاسقان ۇقكۇ شەكارا قىزمەتىنىڭ بولىمدەرى كۇشەيتىلگەن رەجيمدە قىزمەتىن جالعاستىرۋدا»، – دەدى.

28 ساۋىردە باتكەن وبلىسىنىڭ تاجىكستانمەن شەكارالاس كوك-تاش اۋىلى ماڭىندا سۋ تاراتۋ پۋنكتى اۋماعىندا قىرعىز جانە تاجىك ازاماتتارى جانجالداسىپ قالعان. 29 ساۋىردە شەكاراداعى جاعداي ۋشىعىپ، ەكى ەلدىڭ اسكەري قىزمەتكەرلەرى اراسىندا اتىس بولعان. سول كۇنى كەشكە تاراپتار اتىستى توقتاتۋعا كەلىسكەنمەن، اتىس جەكەلەگەن جەرلەردە 1 مامىرعا دەيىن جالعاستى. بىشكەكتە تاجىك اسكەريلەرى ققاتىعىس كەزىندە پۋلەمەت، مينومەت جانە مي-24 اسكەري تىكۇشاقتارىن قولدانعان.

رەسمي مالىمەتتەر بويىنشا، تاجىكستانمەن شەكاراداعى قاقتىعىس سالدارىنان قىرعىزستاننىڭ 36 تۇرعىنى قازا تاۋىپ، 150-گە جۋىق ادام زارداپ شەككەن. قاقتىعىس كەزىندە رەسپۋبليكادا جۇزدەن استام عيمارات، ونىڭ ىشىندە ەكى مەكتەپ، ءۇش شەكارا زاستاۆاسى، بالاباقشا، ءورت ءسوندىرۋ ءبولىمى، ميليتسيا بولىمشەسىنىڭ عيماراتى، سونداي-اق جۇزدەن استام ءبىر قاباتتى تۇرعىن ءۇي ورتەنگەن. قاقتىعىس ايماعىنان جالپى العاندا 33 مىڭ بەيبىت تۇرعىن ەۆاكۋاتسيالاندى.

كەڭەس وداعى 1991 جىلى قۇلاعالى بەرى ورتالىق ازياداعى كەيبىر مەملەكەتتەر شەكارا ماسەلەسىن شەشە الماي كەلەدى. اسىرەسە، تاجىكستان، وزبەكستان مەن قىرعىزستانعا ورتاق فەرعانا اڭعارى بويىنداعى اۋماقتىڭ داۋلى تۇستارى كوپ. قىرعىز-تاجىك شەكاراسىنىڭ ۇزىندىعى شامامەن 980 كم. قازىرگە دەيىن 580 كيلومەترىنە بايلانىستى دەليميتاتسيا جانە دەماركاتسيا جۇمىستارى جۇرگىزىلگەن.

2019 جىلى قىرعىز-تاجىك شەكاراسىندا كەمىندە ون جانجال بولعان. ءتورت جاعدايدا ادام ولگەن. قىركۇيەك ايىندا بولعان قاقتىعىستان بىرنەشە ادام قازا تاپتى.

"The Qazaq Times"