قۇتىداعى Pfizer-BioNTech ۆاكتسيناسى. فوتو: Justin Tallis / كورنەكى سۋرەت

دەنساۋلىق ساقتاۋ مينيسترلىگى QT سۇراۋ حاتىنا بەرگەن جاۋابىندا اقش پەن قىتاي ۆاكتسينالارى بويىنشا 1 ملن دوزا كولەمىندە كەلىسسوز ءجۇرىپ جاتقانىن مالىمدەدى.

14 ساۋىردەگى وكق الاڭىندا وتكەن بريفينگتە دەنساۋلىق ساقتاۋ ۆيتسە-ءمينيسترى مارات شورانوۆ رەداكتسيا سۇراقتارىنا جازباشا جاۋاپ بەرۋگە ۋادە ەتكەن ەدى. رەسمي جاۋاپقا قاراعاندا، قازاقستان حالقىن ۆاكتسيناتسيالاۋ باعدارلاماسىمەن تولىق قامتۋ ءۇشىن مينيسترلىك قازىرگى تاڭدا «Sinopharm  (قىتاي) جانە Pfizer (اقش) سياقتى وندىرۋشىلەرمەن 1 ملن دوزا مولشەرىندە قوسىمشا ەكپە جەتكىزۋ جونىندە كەلىسسوزدەر جۇرگىزىپ جاتىر». دەگەنمەن ەكى كومپانيادان الىنۋى مۇمكىن جوسپارلى كولەمى ايتىلماعان.

وسىعان دەيىن تسوي 30 ناۋرىزداعى بريفينگتە Pfizer, Johnson & Johnson, Moderna ەكپەسىن ساتىپ الۋ ءۇشىن كەلىسسوز جۇرگىزىپ جاتقانىن جەتكىزگەن ەدى. جارتى اي وتكەننەن كەيىن ۆەدومستۆو باتىس ەلدەرىنىڭ ەكى ءوندىرۋشىسىن اتامادى. ءساۋىر ايىنىڭ العاشقى ۇكىمەت وتىرىسىندا مينيستر الەكسەي تسوي ايدىڭ سوڭىنا دەيىن 2 ملن دوزا ەكپە جەتكىزىلەتىنىن، ونىڭ شەتەلدىك «وزگە وندىرۋشىلەردەن» كەلەتىن 500 مىڭ داناسى ەلگە 27 ساۋىردەن باستاپ ەگىلە باستايتىنىن حابارلاعان.

اقش-گەرمانيا كومپانيالارى بىرلەسىپ ازىرلەگەن Pfizer-BioNTech (BNT162b2) ەكپەسىن اۋقىمدى كولەمدە العاش قولدانعان ەلدەر قاتارىندا اقش، ۇلىبريتانيا جانە يزرايل (حالقىنىڭ 80%-ى العان) بار. وندىرۋشىلەردىڭ مالىمەتىنشە، -70°C اۋا تەمپەراتۋراسىندا ساقتالۋى ءتيىس ۆاكتسينانىڭ العاشقى دوزاسىنان كەيىن-اق بىردەن تيىمدىلىگى 95%-دى كورسەتەدى. ارادا 21 كۇن وتكەن سوڭ ەكىنشى دوزاسىن سالدىرۋ قاجەت. جىل سوڭىنا دەيىن 1,3 ملرد دوزاسىن ءوندىرۋ جوسپارلانعان.

2,4 ملن ازاماتى ەكپە العان اۆستريانىڭ دەنساۋلىق ساقتاۋ سالاسىنداعى قاۋىپسىزدىك جونىندەگى فەدەرالدى اگەنتتىگى 27 جەلتوقسان-16 ءساۋىر ارالىعىنداعى ەكپە ناۋقانىنىڭ ەسەبىن جاريالادى. Pfizer-BioNTech ۆاكتسيناسىن العان 64 ادام قايتىس بولعان جانە 4820 ادام جاناما اسەرىن سەزىنگەن. دەگەنمەن ءبىر ءولىم جاعدايىنىڭ ۆاكتسينانىڭ سەبەبىنەن ەكەنى دالەلدەنگەن، ياعني بارلىعى ەكپە كەسىرىنەن قايتىس بولماعان. ددسۇ اتالعان ۆاكتسينادان باس تارتپاۋعا شاقىرىپ، ونى قولدانۋ نۇسقاۋلىعىن تولىقتىردى. Pfizer ۆاكتسيناسىنىڭ ءتۇرلى شتامعا بىردەي توتەپ بەرە المايتىنى ايتىلادى. الايدا ازىرگە بىردە-ءبىر ەكپە مۋتاتسيالانعان شتامنىڭ بارلىق ۇلگىسىنەن قورعاۋعا كەپىلدىك بەرە المايدى.

قازاقستاندا 1 اقپاننان بەرى 766,5 مىڭنان اسا ادام رەسەيلىك سپۋتنيك V ەكپەسىنىڭ العاشقى دوزاسىن العان. ونىڭ  126 مىڭى ەكى دوزانى تولىق سالدىرعان. ۇكىمەتتىڭ جالپىحالىقتىق ۆاكتسيناتسيا ناۋقانىن جۇرگىزۋگە ارنالعان جوسپارى مەن ىسكە اسىرۋ بارىسى قوعام مەن اقوردا تاراپىنان قاتتى سىنعا ۇشىرادى. ەكپەنىڭ باستالعانىنا ەكى جارىم اي وتسە دە پروتسەسس باياۋ ءوتىپ جاتىر.

"The Qazaq Times"