شۇعىل شاقىرتۋ بويىنشا تۇرعىن ءۇيدىڭ بىرىنە كەلگەن جەدەل جاردەم قىزمەتىنىڭ كوروناۆيرۋستىق بريگاداسى. ءساۋىر 2021 جىل. الماتى قالاسى. فوتو: QT / كۇلتەگىن اسپانۇلى

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 12 ءساۋىر كوروناۆيرۋس جۇققان 2016 ادام، ال 11-ءى كۇنى كوروناۆيرۋس پنەۆمونياسىنا شالدىققان 10 ادام تىركەلدى. قازىر ەلدە 35 مىڭنان اسا ادام (U07.1 نەمەسە كۆي+ بويىنشا 34 709, U07.2 نەمەسە كۆي- بويىنشا 475) اۋىرىپ جاتىر.

#U07.1 پتر تەستى ارقىلى كوروناۆيرۋس جۇققانى راستالعان ناۋقاستاردىڭ جارتىسىنا جۋىعى الماتى قالاسى (598) مەن استانادا (337) تىركەلدى. ودان كەيىنگى قاتاردا ەڭ كوبى – الماتى وبلىسى (263), قاراعاندى (203), بقو (113),  اقمولا (90), اقتوبە (85) وبلىستارىندا. وتكەن تاۋلىكتە اۋرۋدان ايىققان 1197 ادام ۇيىنە جىبەرىلگەن. بۇدان وزگە جەكسەنبى جيىنى 24 ادام قايتىس بولعان.

#U07.2 11 ءساۋىر اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 104 ناۋقاس ەسەپكە الىندى. ۆەدومستۆو دەرەگىنشە، قوستاناي وبلىسى (3) مەن استانادا (2), شىمكەنت، الماتى، اقمولا، تۇركىستان وبلىستارىندا (ارقايسىن ءبىر-بىردەن) كوپتەپ تىركەلگەن. سونىمەن قوسا، 101 ادام ايىعىپ شىققان، وكىنىشتىسى 4 ادام كوز جۇمعان.

#جالپى  دەنمين-ءنىڭ رەسمي مالىمەتىنشە، ەمدەلىپ جاتقان 35 178 ناۋقاستىڭ 12 مىڭى اۋرۋحانادا، 23 مىڭعا جۋىعى امبۋلاتورلىق باقىلاۋدا. احۋالى ناشار 586 ناۋقاستىڭ جاعدايى قيىن، ونداعى 175 ادامنىڭ ءحالى وتە اۋىر. بۇدان وزگە 112 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وسىلايشا ازىرگە ۆيرۋستىڭ تارالۋ قاتەرى جاعىنان شقو مەن تۇركىستان وبلىستارى «جاسىل ايماقتا». شىمكەنت قالاسى، قىزىلوردا جانە پاۆلودار، قوستاناي، جامبىل، ماڭعىستاۋ، سولتۇستىك قازاقستان وبلىستارى «سارى»، ال اتىراۋ، بقو، اقتوبە، اقمولا، الماتى، قاراعاندى وبلىستارى، الماتى قالاسى مەن استانا «قىزىل ايماقتا» تۇر.

ۇكىمەت مۇشەلەرىنىڭ مالىمەتىنشە، گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق جانە وڭتۇستىكافريكالىق شتامدارى انىقتالعان.

ەلدە قاڭتار ايىنىڭ ەكىنشى جانە اقپان ايىنىڭ العاشقى جارتىسىندا ناۋقاستار قاتارى كۇرت كوبەيگەن. اقپان ايىنىڭ ەكىنشى جارتىسىندا ءبىرشاما كەمىگەن ەدى، دەسە دە ناۋرىزدا قايتا ارتتى. قازىر تاۋلىگىنە 2 مىڭ سىرقات جانە 15 شاقتى ءولىم جاعدايى تىركەلىپ جاتىر. ءساۋىر ايىنىڭ ءبىر جارىم اپتاسىندا تابىلعان كەيستەر سانى – 27,5 مىڭ سىرقات جانە 225 ءولىم جاعدايى. جالپى كوكتەم تۋعالى 62 مىڭنان اسا (كۆي+ 60 مىڭ، كۆي- 2 مىڭ) ناۋقاس انىقتالدى، 591 ادام (كۆي+ 488, كۆي- 103) ومىردەن قايتتى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 274 مىڭعا، 1 تامىزدان بىلايعى كوروناۆيرۋس پنەۆمونياسى 51 مىڭعا جەتكەن. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 325 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 5,6 مىڭى (كۆي+ / U07.1 – 3260, كۆي- / U07.2 – 731, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان. ەسكەرەر جايت، مينيسترلىك 2020 جىلى كۆي- ستاتيستيكاسىن ەسەپكە الماس بۇرىن جىلداعىدان ءۇش ەسەگە وسكەن پنەۆمونيانىڭ 256 مىڭ جاعدايىنان (بىلتىرعى قاڭتار-شىلدە ارالىعىنداعى) كوروناۆيرۋستىق ءتۇرىن انىقتاپ-زەرتتەۋدەن باس تارتقان. ماماندار وسى كەيستەردى وبەكتيۆتى تۇردە زەردەلەگەندە شىنايى ەسەپ قازىرگىدەن الدەقايدا كوپ بولار ەدى دەپ ەسەپتەيدى. دەمەك جوعارىداعى سان دا ناقتى بولماۋى مۇمكىن.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 49-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 384 مىڭ ادام كوروناۆيرۋسقا قارسى رەسەيلىك «Sputnik V» ۆاكتسيناسىنىڭ العاشقى دوزاسىن العان.

"The Qazaq Times"