رەسەيلىك «سپۋتنيك V» ۆاكتسينالارىن جەتكىزۋ. كورنەكى سۋرەت. فوتو: سك-فارماتسيا اق

استانا مەن الماتى قالاسىنىڭ دەنساۋلىق ساقتاۋ باسقارما باسشىلارى دەنساۋلىق ساقتاۋ مينيسترلىگىنىڭ جوسپارىنان بەيحابار ەكەنىن ايتادى.

9 ءساۋىر ورتكوم الاڭىندا وتكەن بريفينگتە ەلوردا قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ءمينيستردىڭ «الابوتەن 63 مىڭدىق» دوزاسىن بىلمەيتىنىن ايتتى.

«استاناعا ءساۋىر ايىندا 287 مىڭ دوزا جەتكىزۋ جوسپارلانىپ وتىر. ونىڭ 6 مىڭى قازاقستاندىق، قالعانى قاراعاندىدا وندىرىلگەن گام-كوۆيد-ۆاك ۆاكتسيناسى. بىزدە باسقا اقپارات جوق»، – دەدى ول.

استانانىڭ قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ. 9 ءساۋىر 2021 جىل. فوتو: وكق

وسىعان ۇقساس جاۋاپتى الماتىلىق ارىپتەسى تابىنباەۆ تا قايتالادى. ءبىر ايدان بەرى «قىزىل ايماقتان» شىعا الماي وتىرعان الماتى قالاسىنىڭ قوعامدىق دەنساۋلىق ساقتاۋ باسقارماسىنىڭ جەتەكشىسى 144,9 مىڭ دوزانىڭ قاينار-كوزىنەن بەيماعلۇم.

– الماتى قالاسىنا ءساۋىر اااايىندا 300 مىڭ ۆاكتسينا ءبولۋ جوسپارلانعان. دەنساۋلىق ساقتاۋ مينيسترلىگىمەن كەلىسىلگەن. اقپاننان بەرى العا ەكى پارتياسى رەسەيدە شىققان ۆاكتسينا بولدى. ناۋرىز جانە ءساۋىر ايلارىندا الىنىپ جاتقان ەكپە – قاراعاندىدا وندىرىلگەن. جالپى باسقا ەلدەردە وندىرىلگەن ۆاكتسينا الماتىعا كەلەدى دەگەن اقپارات العانىمىز جوق، – دەدى ناريمان تابىنباەۆ.

الماتى قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى ناريمان تابىنباەۆ ورتالىق كوممۋنيكاتسيا قىزمەتىندە وتكەن بريفينگكە قاشىقتان ونلاين قاتىسىپ وتىرعان ءساتى. 9 ءساۋىر 2021 جىل. فوتو: وكق

اڭتارىلعان باسشى الەكسەي تسوي ايماقتاعى جاۋاپتى ماماندارىن قۇلاقتاندىرماعان نەمەسە بايانداماداعى دەرەك قاتە مە دەگەن سۇراققا مۇنداي دەرەكتى بىلمەيتىنىن، بارلىق ءىس كەلىسىمشارت نەگىزىندە جۇزەگە اساتىنىن جەتكىزدى.

«بۇل ەشقانداي جالعانعا جاتپايدى. ءبىز ورىنداۋشى قىزمەتكەر بولعاندىقتان، ناقتى كەلىسىمشارت بويىنشا ايتىپ وتىرمىز. ۆاكتسينا تاپشىلىعى تۋرالى بارلىعىمىز بىلەمىز. ...باسقا مەملەكەتتەن الۋ دۇرىس دەپ ەسەپتەيمىز»، – دەدى ناريمان بولتايۇلى.

6 ءساۋىر كۇنگى ۇكىمەت وتىرىسىندا دەنساۋلىق ساقتاۋ ءمينيسترى الەكسەي تسوي ءساۋىر ايىندا ەلگە «ەكپە الۋعا ءتيىس كونتينگەنتتىڭ 23,4%-ىن قامتيتىن 2 ملن دوزا» ۆاكتسينا جەتكىزىلەتىنىن مالىمدەگەن. «ونىڭ 1,5 ميلليونى سپۋتنيك V, 25 مىڭى QazCovid-in جانە 500 مىڭى وزگە وندىرۋشىلەردىڭ ۆاكتسيناسى» دەلىنگەن مينيستر بايانداما-سلايدىندا. العاشقى ترانش ءساۋىردىڭ 9-ى باستالسا، كەيىنگى كەزەڭدەرى 13, 23, 26, 28-ىنە جوسپارلانعان. ءبىر قىزىعى، وتاندىق ۆاكتسينا QazVac-تىڭ تاراتىلۋ مەرزىمى ايتىلمادى.

27 ساۋىردەن باستاپ «وزگە وندىرۋشىلەردەن» 0,5 ملن دوزا الىنادى، الايدا بۇل قاي ەلدەردىڭ قانداي ۆاكتسيناسى ەكەنى بەلگىسىز. رەسمي دەرەككە قاراعاندا، الماتى قالاسىنا وسى ايدا سپۋتنيك V-ءدىڭ 316 مىڭ، QazCovid-in ەكپەسىنىڭ 3 مىڭ جانە وزگە وندىرۋشىلەردەن 145 مىڭعا جۋىق دوزاسى جەتكىزىلمەك. ال استاناعا 217 مىڭ رەسەيلىك جانە 3 مىڭ وتاندىق ۆاكتسينا، سونىمەن قوسا باسقا وندىرۋشىلەر 63 مىڭنان اسا دوزا الىپ كەلەتىنى حابارلاندى. بۇل دەرەكتى ناقتىلاماق بولىپ بىرنەشە مارتە جاۋاپتى ماماندارعا سۇراق جولدادىق. الماتى قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىلىعىنان بريفينگتەردە بىرنەشە رەت سۇرادىق. «وزگە وندىرۋشىلەر» كىمدەر ەكەنى جايلى ەشكىم جاۋاپ بەرمەدى.

قازاقستاننىڭ دەنساۋلىق ساقتاۋ ءمينيسترى الەكسەي تسويدىڭ ۇكىمەت وتىرىسىندا ءساۋىر ايىنا جوسپارلانعان ۆاكتسينا جەتكىزىلىمى تۋرالى بايانداماسىنان. كەستەنىڭ 9-ىنشى باعانىندا ەلگە "وزگە وندىرۋشىلەردەن" جەتكىزىلەتىن ەكپە كولەمى كورسەتىلگەن. 6 ءساۋىر 2021 جىل. فوتو: قر ۇكىمەتى ەفيرىنەن سكرين-قيىندى

"The Qazaq Times"