قىرعىزستان كونستيتۋتسياسىن وزگەرتۋ جوباسىنا قارسى وتكەن ميتينگ. 9 ناۋرىز، 2021 جىل. فوتو: akipress.org

قىرعىزستان كونستيتۋتسياسىنا وزگەرىستەر ەنگىزۋ تۋرالى جالپىحالىقتىق داۋىس بەرۋ 11 ساۋىردە وتەدى. بۇل تۋرالى زاڭ شىعارۋشى ورگانىنىڭ ءباسپاسوز قىزمەتىن حابارلادى.

بۇگىن دەپۋتاتتار كوپشىلىك داۋىسپەن «قىرعىز رەسپۋبليكاسىنىڭ كونستيتۋتسياسى تۋرالى» زاڭ جوباسى بويىنشا رەفەرەندۋم تاعايىنداۋ تۋرالى زاڭدى ماقۇلداعان. سول كۇنى ەلدە جەرگىلىكتى بيلىك ورگاندارىنا سايلاۋ وتكىزۋ جوسپارلانعان.

9 ناۋرىز قىرعىزستاندا پرەزيدەنت جاپاروۆ ۇسىنعان جاڭا كونستيتۋتسيا جوباسىنا قارسى ميتينگ ءوتتى. شەرۋگە شىققاندار «زاڭسىز» پارلامەنتتىڭ تاراتىلۋىن تالاپ ەتتى. بۇعان دەيىن حالىقارالىق ۇيىمدار مەن ساراپشىلار دا بۇل جوبانى سىنعا العان. وزگەرىستەر ەنگىزىلگەن كونستيتۋتسيادا ەلدەگى ءسوز ەركىندىگى مەن دەموكراتياعا قاۋىپ توندىرەتىن بىرقاتار تارماقتار بار. ايتالىق، زاڭدىق نورمادا انىق بەكىتىلمەگەن «ەلدىڭ يماندىلىعىنا، قىرعىزدىڭ ۇلتتىق سالت-ساناسىنا قايشى ءىس-شارالارعا شەكتەۋ قويىلادى» دەگەن تارماقتار كەزدەسەدى. بۇنى كەيبىر قىرعىز ساياساتكەرلەرى  بيلىك باسىنداعىلاردىڭ دەموكراتيا مەن ءسوز بوستاندىعىن شەكتەۋگە ماقساتىندا قوسقان كۇماندى ەرەجەلەر دەپ سانايدى.

سونىمەن قاتار، جوبادا پرەزيدەنتتىڭ وكىلەتى ەداۋىر ۇلعايعان: ول اتقارۋ بيلىگىنە جەتەكشىلىك ەتىپ، مينيسترلەر كابينەتىنىڭ قۇرامى مەن قۇرىلىمىن انىقتايدى، پرەزيدەنت اكىمشىلىگى مەن قاۋىپسىزدىك كەڭەسىن جاساقتاپ، ونى باسقارادى. ەگەر كونستيتۋتسيا زاڭدىق كۇشىنە ەنسە، پرەزيدەنت باس پروكۋرور، ۇلتتىق قاۋىپسىزدىك كوميتەتىنىڭ توراعاسى، جوعارعى جانە كونستيتۋتسيالىق سوت، سۋديالاردى دا تاعايىنداۋ قۇقىعىنا يە. ءوز بەتىنشە رەفەرەندۋم دە بەلگىلەي الادى. زاڭ شىعارۋ باستاماسىن كوتەرە الادى.

"The Qazaq Times"