بەلارۋستە تاۋەلسىز جۋرناليستەر قامالىپ جاتىر

مينسك سوتى «بەلسات» پولياك تەلەارناسىنىڭ جۋرناليستەرى كاتەرينا اندرەەۆا مەن داريا چۋلتسوۆتى 15 قاراشادا بولعان نارازىلىقتان تىكەلەي رەپورتاج جاساعانى ءۇشىن ەكى جىلعا باس بوستاندىعىنان ايىردى.

جۋرناليستەر تاراپىنان مەملەكەتتىك كەشىرىم سۇرالسا دا، بەلارۋس بيلىگى ولاردىڭ قۇجاتىن قاراۋدان باس تارتقان. سوت ايىپتاۋدىڭ تولىق نۇسقاسىن قابىلدادى. قوس جۋرناليست «ماتەريالدارىمەن جاپپاي تارتپسىزدىك ۇيىمداستىردى» دەگەن ايىپپەن ەكى جىلعا قامالدى.

كاتەرينا باحۆالوۆا مەن داريا چۋلتسوۆا. فوتو: ۆۆس

تىلشىلەردى رەپورتاج كەزىندە ومون ۇستاعان. العاشقىدا ولار جەتى كۇن اكىمشىلىك قاماۋعا الىندى، بىراق بوستاندىققا شىقپادى. كەيىننەن مينسك سوتى جاپپاي تارتىپسىزدىكتەر ۇيىمداستىردى دەگەن ايىپپەن ولاردىڭ ۇستىنەن قىلمىستىق ءىس قوزعادى.

17 اقپاندا بەلارۋستە پوليتسيا ونداعان جۋرناليست پەن قۇقىق قورعاۋشىلارعا ءتىنتۋ جۇرگىزگەن بولاتىن. ءتىنتۋ ەلدىڭ بارلىق وبلىس ورتالىقتارىندا – مينسك، برەست، گومەل جانە باسقا ايماقتاردا تاڭەرتەڭ باستالعان. ناتيجەسىندە، بەلگىسىز سەبەپتەرمەن ەكى ادام قاماۋعا الىنعان.

مينسكىدە ولار بەلارۋس جۋرناليستەر قاۋىمداستىعىنىڭ باسشىلىعىنا دا ءتىنتۋ جۇرگىزدى. كەيىننەن پوليتسيا ۇيىمنىڭ كەڭسەسىنە دە باردى. بۇل تاۋەلسىز ۇيىم 1995 جىلى بەلارۋس جۋرناليستەرىنىڭ رەسمي وداعىنا قارسى قۇرىلعان.

گومەلدە سەگىز تاۋەلسىز جۋرناليست پەن قۇقىق قورعاۋشىلار، موگيلەۆتە ەكى جۋرناليست جانە «ۆەسنا» رتالىعىنىڭ ەكى ايماقتىق قىزمەتكەرىن تەكسەردى. ساراپشىلار بەلارۋس بيلىگىنىڭ بۇل قادامىن «ءسوز بوستاندىعىنا قايشىلىق جانە ديكتاتۋرانىڭ ايقىن كورىنىسى» دەپ سانايدى.

9 تامىز بەلارۋستە پرەزيدەنتتىك سايلاۋ ءوتتى. سول كۇنى وسك الەكساندر لۋكاشەنكونىڭ 80,10% داۋىس جيناپ، جەڭىسكە جەتكەنىن حابارلادى. سايلاۋ ناتيجەلەرىن مويىنداۋدان باس تارتقان سۆەتلانا تيحانوۆسكايا كانديدات رەتىندە 10,12% داۋىس جيناعان.

داۋىس بەرۋ قورىتىندىلارى شىعارىلعاننان كەيىن ەلدە جاپپاي نارازىلىق اكتسيالارى باستالدى. ءىرى قاقتىعىستار كەزىندە پوليتسيا شەرۋگە شىققاندارعا قارسى وق اتىپ، كۇشپەن باسىپ-جانشۋعا تىرىستى. قازىر بەلارۋستە جەرگىلىكتى نارازىلىق اكتسيالارى ءالى دە جالعاسۋدا.

"The Qazaq Times"