«قاشىپ كەتكەن» جەەنبەكوۆ قىرعىزستانعا ورالدى

قىرعىزستاننىڭ ەكس-پرەزيدەنتى سوورونباي جەەنبەكوۆ شەتەلگە ساپارىنان كەيىن بىشكەككە ورالدى. بۇل تۋرالى «ازاتتىق ۇنالعىسى» حابارلادى.

اقپاننىڭ باسىندا الەۋمەتتىك جەلىدە جەەنبەكوۆ شەتەلگە «قاشىپ كەتتى» دەگەن اقپارات تاراعان. 2 اقپاندا جەەنبەكوۆتىڭ ءباسپاسوز حاتشىسى تولگوناي ستاماليەۆا ەكس-پرەزيدەنتتىڭ ساۋد ارابيا كورولىنىڭ شاقىرۋىمەن مەككەگە قاجىلىققا كەتكەنىن مالىمدەدى.

30 قاڭتاردا جەەنبەكوۆ پرەمەر-ءمينيستردىڭ بۇرىنعى ورىنباسارى دۋيشەنبەك زيلاليەۆتىڭ قىلمىستىق ىسىنە قاتىستى سوتقا شاقىرىلعان. ەكس-پرەزيدەنتكە قاتىستى شاعىمدى «قىرعىز ۇكىمەتى» قوزعالىسى تۇسىرگەن. بۇرىنعى ۆيتسە-پرەمەردىڭ ەنشىسىندە دەكلاراتسياعا ەنبەگەن ءۇي، پاتەر، ەسەپشوت جانە ميلليونداعان دوللار قاراجات تابىلعان. اتالعان ءىس بويىنشا ءبىرىنشى ماي اۋداندىق سوتى دۇيشەنبەك زاليلوۆقا 9 جىلعا باس بوستاندىعىنان ايىرۋ جازاسىن شىعاردى. ەندى ول بۇل قاراجات سوورونباي جەەنبەكوۆتىڭ سايلاۋ ناۋقانىنا ارنالعانىن مالىمدەدى.

بىلتىر قازاننىڭ باسىندا قىرعىزستاندا پارلامەنتتىك سايلاۋ ناتيجەلەرىنە قارسى جاپپاي نارازىلىق اكتسيالارى باستالدى. 6 قازانعا قاراعان ءتۇنى جاپاروۆ جازاسىن وتەپ جاتقان شۋ وبلىسىنداعى كولونيادان ءوز جاقتاستارىمەن بوساتىلدى. سول كۇنى قىرعىزستاننىڭ جوعارعى سوتى ونىڭ ۇكىمىن جويدى.

15 قازاندا پرەزيدەنت سوورونباي جەەنبەكوۆ وپپوزيتسيانىڭ قىسىمىمەن وتستاۆكاعا كەتتى. كونستيتۋتسياعا سايكەس، جاڭا سايلاۋ وتكىزىلگەنگە دەيىن مەملەكەت باسشىسىنىڭ مىندەتتەرىن پارلامەنت سپيكەرى اتقارۋى ءتيىس ەدى. الايدا سپيكەر قاناتبەك يساەۆ پرەزيدەنتتىڭ وكىلەتتىگىن پرەمەر-مينيستر سادىر جاپاروۆقا بەردى.

"The Qazaq Times"