نازارباەۆتار اۋلەتىنىڭ قۇداسى، بەلگىلى وليگارح قايرات بورانباەۆ پەن تاعى بىرقاتار كاسىپكەر يەلىك ەتەتىن، ۆاكتسينا وندىرەتىن قاراعاندى فارماتسەۆتيكالىق كەشەنىنىڭ العاشقى پارتياسى. فوتو: اشىق دەرەككوز

رەسەيلىك «سپۋتنيك V» ۆاكتسيناسىنىڭ قازاقستان اۋماعىندا وندىرىلەتىن «گام-كوۆيد-ۆاك» نۇسقاسى 1 اقپاننان باستاپ ەگىلىپ جاتقانىنا قاراماستان مەملەكەتتىك تىركەۋدەن ەندى ءوتتى.

قاراعاندى فارماتسەۆتيكالىق كەشەنىنىڭ ءباسپاسوز قىزمەتى حابارلاعانداي، وتكەن سەنبىدە 13 اقپان دەنساۋلىق ساقتاۋ مينيسترلىگىنىڭ ساراپتاما ۇيىمى ۆاكتسينانىڭ قاۋىپسىزدىگى، ساپاسى مەن تيىمدىلىگى تۋرالى قورىتىندىعا كەلگەن.

قازىردىڭ وزىندە مىڭداعان مامانعا ەگىلگەن ۆاكتسينانىڭ تىركەۋ كۋالىگىن الۋعا مينيسترلىكتىڭ مەديتسينالىق جانە فارماتسەۆتيكالىق باقىلاۋ كوميتەتىنە ءوتىنىم جولدانعان. دەمەك ەكى اپتا بۇرىن باستالعان ەكپە ناۋقانى رەسمي جۇرگىزىلگەن.

كاسىپورىننىڭ دەرەگىنشە، قازاقستان – «سپۋتنيك-V» ۆاكتسيناسىن قولدانۋدى ماقۇلداعان 27-ءشى ەل. تىزىمدە كرەملدىڭ بايلانىسى مەن ىقپالى بار بەلارۋس، بوليۆيا، سەربيا، الجير، پالەستينا، تۇركمەنستان، ۆەنگريا، ءباا، يران، ارمەنيا جانە موڭعوليا سياقتى مەملەكەتتەردە تىركەلگەن.

ۇكىمەت قفك اقپاننىڭ سوڭىنا دەيىن وڭىرلەرگە «سپۋتنيك V» ۆاكتسيناسىنىڭ 90 مىڭ دوزاسىن جەتكىزەتىنىن مالىمدەدى. رەسەيدەن اكەلىنگەن شيكىزات نەگىزىندە ەكپە وندىرەتىن فارما-كەشەننىڭ يەلەرىنىڭ ءبىرى قازاقستاندى 30 جىلداي بيلەگەن نازارباەۆتاردىڭ قۇداسى بولعان بەلگىلى وليگارح قايرات بورانباەۆ. 15 ملرد تەڭگە قارجى قاراستىرىلعان ءوندىرىس ورنى ءوزىن «بيوتەحنولوگيالىق پرەپاراتتار وندىرىسىنە مامانداندىرىلعان قر-داعى العاشقى جانە ازىرگە جالعىز فارماتسەۆتيكالىق زاۋىت» دەپ سيپاتتايدى. بورانباەۆ تا ۆاكتسينا ءوندىرۋ مۇمكىندىگىنىڭ يەلەنۋ سەبەبى وسى ەكەنىن جانە بۇعان قولجەتكىزۋدە نازارباەۆتار اۋلەتىمەن تۋىتىعىنىڭ ەش قاتىسى جوعىن ايتادى.

"The Qazaq Times"