دەمالىس كۇنگى دەرەك: قازاقستاندا ۆيرۋس جۇققاندار سانى تاعى دا مىڭنان استى

7 اقپان كوروناۆيرۋس جۇققان 1003 ادام، ال 6 اقپان كوروناۆيرۋس پنەۆمونياسىنا شالدىققان 18 ادام تىركەلدى. قازىر ەلدە 27 مىڭنان استام ادام (U07.1 نەمەسە كۆي+ بويىنشا 16 770, U07.2 نەمەسە كۆي- بويىنشا 10 258) اۋىرىپ جاتىر. 

#U07.1 ۆيرۋس جۇققانداردىڭ تاۋلىكتىك كورسەتكىشى بويىنشا الماتى قالاسى ەكىنشى قاتارعا شىقتى. كوروناۆيرۋس پتر تەستى ارقىلى تابىلعان جاڭا كەيستەردىڭ ەڭ كوبى – پاۆلودار (222), اقمولا (118), الماتى قالاسى (114), بقو (83), قوستاناي (81), استانا (75) وبلىستارىندا. وتكەن تاۋلىكتە 843 ادام اۋرۋىنان ايعىپ، ۇيىنە جىبەرىلگەن، سونداي-اق 6 ادام ومىردەن وتكەن.

#U07.2  سەنبى كۇنى، ياعني اقپاننىڭ 6-سى كوروناۆيرۋس پنەۆمونياسىنا جاتاتىن 18 ناۋقاس جانە 5 ءولىم جاعدايى تىركەلگەن. پنەۆمونيا انىقتالعان ناۋقستاردىڭ ەڭ كوبى – جامبىل (6),  تۇركىستان (5), بقو (2), اقتوبە، ماڭعىستاۋ جانە الماتى وبلىستارى، استانا مەن شىمكەنت قالاسىنا (ارقايسىندا بىردەن) تيەسىلى. اقپاراتى ءبىر تاۋلىككە كەشىگىپ بەرىلەتىن پنەۆمونيادان ايىققاندار سانى 246-عا ارتتى.

#جالپى  ەكىنشى تولقىنداعى كۇندەلىكتى كورسەتكىش قۇبىلمالى. قاڭتار ايىنىڭ ورتاسىنان بەرى تاۋلىگىنە ۇدايى مىڭنان كەم ەمەس جاعداي انىقتالۋدا. ماسەلەن، كوروناۆيرۋس پەن وسىعان ۇقساس پنەۆمونيانى قوسا ەسەپتەگەندە وتكەن جۇمادا 1210 جانە سەنبىدە 1164 ناۋقاس انىقتالعان.

دەنمين-ءنىڭ رەسمي مالىمەتىنشە, ەمدەلىپ جاتقان 27 028 ناۋقاستىڭ 5804-ءى اۋرۋحانادا، 21 224-ءى امبۋلاتورلىق باقىلاۋدا. احۋالى ناشار 268 ناۋقاستىڭ جاعدايى اۋىر، تاعى 49 ادامنىڭ ءحالى وتە اۋىر. بۇدان وزگە 42 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

اقپارات مينيسترلىگىنىڭ coronavirus2020.kz سايتى مەن دەنساۋلىق ساقتاۋ مينيسترلىگىنىڭ مەديا رەسۋرستارىندا جاريالانعان دەرەكتەر بىرنەشە ايدان بەرى قاتە بەرىلىپ كەلگەنى جايلى ماتەريالدار جاريالاپ، اقپارات قۇرالدارىنا ەسكەرتكەنبىز. 26 جەلتوقساننان باستاپ مينيسترلىك كەمشىلىگىن مويىنداپ، رەسمي حابارلامانىڭ فورماسىن وگەرتتى. ستاتيستيكانىڭ پنەۆمونياعا قاتىستى مەرزىمىن كورسەتىپ جاريالاۋعا كوشتى.

(!) پاندەميا مودەراتورى – مينيسترلىك تەك سەنبى-جەكسەنبىدە عانا ەمەس، مەرەكە كۇندەرى دە ستاتيستيكانى تولىقتاي جۇرگىزۋگە قاۋقارسىز. ماسەلەن، جەلتوقسان ايىنىڭ 1, 16, 17, 18-ءى جانە 19-ىنا، 1-4, 7 قاڭتارعا تيەسىلى دەرەكتەر ەسەلەپ كەمىگەن. كۇزدىڭ ورتاسىندا سول كەزدەگى دەنمين-ءنىڭ رەسمي-ەرىكتى وكىلى باعدات قوجاحمەتوۆ ەكىنشى تولقىندا دەمالىس كۇنىنە قاراماستان ستاتيستيكانى تولىق كولەمدە جۇرگىزۋگە ۋادە بەرگەن ەدى. بىراق ءىس جۇزىندە ولاي بولماي شىقتى. 

The Qazaq Times رەداكتسياسى تومەندەگى كەستەنى رەسمي مالىمەتتىڭ رەتتەلگەن نۇسقاسى دەپ سانايدى.

وسى قىستىڭ باسىندا باس مەملەكەتتىك سانيتار-دارىگەر ەرلان قياسوۆ قازاقستاندا كەزەكتى تولقىنىنىڭ شارىقتاۋ كەزەڭى قاڭتار-اقپان ايلارىنا، ال مينيستر الەكسەي تسوي ناۋرىز ايىنىڭ سوڭىنا قاراي تۇسپا-تۇس كەلەتىنىن مالىمدەگەن.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 191 مىڭنان، 1 تامىزدان بەرگى كوروناۆيرۋس پنەۆمونياسى 48 مىڭنان اسقان. ددسۇ مالىمەتىنشە، قازاقستاندا اۋىرعانداردىڭ سانى 243 مىڭعا جەتسە، ال ۇلتتىق ستاتيستيكادا 244.5 مىڭعا جۋىقتاعان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. وسى ۋاقىتقا دەيىن كۆي+ دياگنوزى بويىنشا جاڭا انىقتالعان ناۋقاستار ايماقتارداعى كورسەتكىشى كۇندەلىكتى، ال كۆي- دەرەگى تەك جيىنتىق ماندە بەرىلىپ كەلگەن. QT بىرنەشە اي بويى مينيسترلىككە وسى ماسەلەنى كوتەرىپ، ونداعان سۇراۋ جولداعان. اقپاننىڭ 3-ىنەن باستاپ قانا كوروناۆيرۋس پنەۆمونياسىنىڭ كۇن سايىنعى ايماقتارداعى ەسەبى تاراتىلىپ جاريالانۋعا كوشتى.

ازىرگە ۆيرۋس تارالۋ قاتەرى جاعىنان  اقمولا، پاۆلودار وبلىستارى مەن استانا – قىزىل; اتىراۋ، بقو، سقو، قوستاناي وبلىستارى – سارى ايماقتا تۇر.

پاندەميا باستالعالى جالپى ۆيرۋس جۇققانداردىڭ 4246-سى (كۆي+ / U07.1 – 2601, كۆي- / U07.2 – 584, ىلەسپە اۋرۋلاردان – 1061) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 1061 ادامدى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قوعامدا بىلتىرعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى «ماۋسىم-شىلدە قىرعىنان» كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

قازاقستان ۆيرۋس تارالۋى بويىنشا الەمدە Worldometers دەرەكقورى جانە ددسۇ تىزىمىندەگى 221 ەل مەن ايماقتىڭ اراسىندا 49-شى ورىندا تۇر.

"The Qazaq Times"