گەرمانيا كانتسلەرى انگەلا مەركەل. فوتو: www.belta.by

گەرمانياداعى لوكداۋن قاڭتاردىڭ سوڭىنا دەيىن ۇزارتىلدى. بۇل شەشىمدى انگەلا مەركەلدىڭ قاتىسۋىمەن وتكەن وتىرىستا ەلدىڭ بارلىق اۋدان باسشىلارى قولداعان.

جيىندا مالىمدەمە جاساعان انگەلا مەركەل: «ناۋقاستاردىڭ سانىن 100 مىڭ ادامعا شاققاندا 50-گە دەيىن ازايتۋدى كوزدەيمىز. بۇل وتە ماڭىزدى. ۇلىبريتانيادا مۋتاتسياعا ۇشىراعان ۆيرۋستىڭ جاڭا شتامى تەز تاراپ جاتىر. سوندىقتان جەلتوقسان ايىندا جاريالانعان كارانتين قاڭتاردىڭ سوڭىنا دەيىن جالعاساتىن بولادى»، – دەيدى.

جاڭا تالاپتارعا ساي ەگەر ءبىر اپتانىڭ ىشىندە 100 مىڭ ادامعا شاققاندا 200 جاڭا ناۋقاس انىقتالاتىن بولسا، تۇرعىندار ءوز ۇيلەرىنەن 15 شاقىرىمنان الىس شىعا المايدى. ال قاۋىپتى ەلدەردەن كەلگەن ازاماتتار 10 كۇن كارانتيندە جاتىپ، كەيىن ۆيرۋستى انىقتايتىن تەست تاپسىرۋلارى كەرەك.

گەرمانياداعى بار، مەيرامحانا، مۇراجاي مەن باسسەيندەر ازىرگە جابىلادى. مەكتەپتەر مەن بالالاقشالار دا ازىرگە اشىلمايدى. تۇرعىندارعا تەك ءبىر عانا اداممەن كەزدەسۋگە رۇقسات بەرىلدى.

كۇنى كەشە ۇلىبريتانيا بيلىگى دە جاپپاي وقشاۋلاۋ رەجيمىنە كوشكەن. وسىعان بايلانىستى مالىمدەمە جاساعان ۇلىبريتانيا پرەمەر-ءمينيسترى بوريس دجونسون: «ءبىر انىعى ۆاكتسينا تولىق ەگىلمەيىنشە، ءبىز بىرىگە وتىرىپ، ارەكەت ەتۋىمىز كەرەك. سوندىقتان انگليادا جالپىۇلتتىق قاتاڭ لوكداۋن جاريالاۋعا ءماجبۇرمىز. سول كەزدە عانا ۆيرۋستىڭ جاڭا ءتۇرىن توقتاتا الامىز»، – دەيدى.

پرەمەر-ءمينيستردىڭ پىكىرىنشە، كوروناۆيرۋستىڭ مۋتاتسياعا ۇشىراعان ءتۇرى وتە جىلدام تاراپ كەلەدى. ۇلتتىق دەنساۋلىق ساقتاۋ قىزمەتى ناۋقاستارعا ەم-دوم كورسەتىپ ۇلگەرمەي جاتىر. الداعى 21 كۇن ىشىندە كەيبىر ايماقتارداعى اۋرۋحانالاردا بوس ورىندار بولماۋى مۇمكىن. انگليادا سوڭعى اپتانىڭ وزىندە ەمدەلىپ جاتقان ناۋقاستاردىڭ سانى ءۇش ەسەگە ارتقان. بۇل ساۋىردە بولعان ءبىرىنشى تولقىنمەن سالىستىرعاندا 40 %-عا كوپ. قوعامدىق پىكىردى زەرتتەۋمەن اينالىساتىن YouGov كومپانياسىنىڭ مالىمەتىنشە، بريتانيالىقتاردىڭ 79 %-ى جاڭا لوكداۋندى قولدايدى.

قازىر الەمدە ۆيرۋس جۇقتىرعاندار سانى 86,4 ميلليونعا جەتتى. 2 ميلليونعا جۋىق ادام دەرتتەن قايتىس بولعان.

"The Qazaq Times"