جالپىۇلتتىق ساۋالناما: گەرمانياداعى ۆاكتسيناتسيالاۋ ناۋقانى

گەرمانيادا ءبىر كۇندە 1 ميلليون 350 مىڭ ادام ۆاكتسينا قابىلدادى. ەكپەنى مەملەكەت باسشىلارى – كانتسلەر انگەلا مەركەل مەن پرەزيدەنت شتاينمايەر دە سالدىردى.

Handelsblatt باسىلىمىنا سۇحبات بەرگەن گەرمانيانىڭ دەنساۋلىق ساقتاۋ ءمينيسترى يەنس شپان: «گەرمانيادا جاڭا رەكورد تىركەلدى. ەلدە ۆاكتسينالاۋ ناۋقانى قارقىندى ءجۇرىپ جاتىر. ۆيرۋستى جۇقتىرۋشىلار قاراسى دا ازايىپ كەلە جاتقانى قۋانتادى. ەندى وسى جەتىستىكتى ودان ءارى جالعاستىرۋ كەرەك»، – دەيدى.

قازىر مۇندا جاسى 60-تان اسقان قارتتار مەن قۇتقارۋشىلاردى، ءورت سوندىرۋشىلەردى جانە ساتۋشىلاردى ەگۋ ناۋقانى ءجۇرىپ جاتىر. ال 17 مامىردان باستاپ ەگدە جاستاعى وزگە توپتاردىڭ الۋىنا رۇقسات ەتىلمەك.
كيولن قالاسىندا مەشىت، اۋەجاي جانە ساۋدا ورتالىقتارىنىڭ تۇراقتارىندا دا ۆاكتسينالاۋ ءجۇرىپ جاتىر. ال بەرلين اكىمشىلىگى كوروناۆيرۋستىڭ تارالۋىن توقتاتۋ ءۇشىن ادامدار تىعىز ورنالاسقان اۋدانداردىڭ تۇرعىندارىنا ەگۋگە كىرىسىپ كەتتى.

جالپىۇلتتىق ساۋالناما بويىنشا، تۇرعىنداردىڭ 67%-ى ەكپە سالدىرعىسى كەلەتىنىن ايتقان. بىراق ۇجىمدىق يممۋنيتەتكە قول جەتكىزۋ ءۇشىن حالىقتىڭ 80%--ءى ەگىلۋگە ءتيىس. بيلىك ەكپە العانداردى شەتەلدەن ورالعاندا وقشاۋلانۋدان بوساتادى، سونداي-اق سۇلۋلىق سالوندارى مەن دۇكەندەرگە تەستىسىز بارۋعا رۇقسات بەرۋدى جوسپارلاپ وتىر.

ددسۇ كوروناۆيرۋس ىندەتىنە قارسى پايدالانۋ ءۇشىن امەريكالىق Pfizer/BioNTech, Jannsen جانە Moderna ەكپەلەرىن، بريتاندىق-شۆەتسيالىق AstraZeneca مەن ونىڭ ۇندىستاندىق نۇسقاسىن ماقۇلداعان. ەۋروپا ەلدەرىندە Pfizer/BioNTech ەكپەلەرى سالىنىپ جاتىر.

پاندەميا باستالعالى گەرمانيادا 3 ميلليوننان استام كەيس تىركەلىپ، 86 166 ادام اجال قۇشقان. اي سايىن كارانتيندى قاتاڭداتىپ، الەۋمەتتىك ديستانتسيا قاتاڭ ساقتالعان گەرمانيا جاقىن ارادا قالىپتى ومىرگە كوشۋگە دايىندالىپ جاتىر.

"The Qazaq Times"