نورۆەگيا پارلامەنتىنىڭ حريستيان-دەموكراتيالىق پارتياسىنىڭ دەپۋتاتى گەير توسكەدال «Vart Land» باسىلىمىنا بەلارۋس وپپوزيتسياسىنىڭ وكىلدەرى سۆەتلانا تيحانوۆسكايا، ماريا كولەسنيكوۆا جانە ۆەرونيكا تسەپكالونىڭ 2021 جىلعى نوبەل سىيلىعىنا ۇسىنىلعانىن حابارلادى.

نوبەلگە ۇمىتكەر اتانعان تيحانوۆسكايا، كولەسنيكوۆا جانە تسەپكالو «ءادىل سايلاۋ» ءۇشىن كۇرەسى جانە «بەلارۋستەگى زاڭسىز رەجيمگە بەيبىت تۇردە قارسى تۇرعانى» ءۇشىن جوعارى ماراپاتقا لايىق دەپ تانىلعان.

بەلارۋستەگى نارازىلىق شەرۋلەرىنە ەكى ايدان استام ۋاقىت ءوتتى. 9 تامىزدا وتكەن پرەزيدەنتتىك سايلاۋدا وسك الەكساندر لۋكاشەنكونىڭ 80% -دان استام، ال سۆەتلانا تيحانوۆسكايا 10% -دان ءسال ارتىق داۋىس جيناعانىن جاريالاعان. كەيىننەن بەلارۋس وپپوزيتسيا وكىلدەرى سايلاۋ ناتيجەسىن جويىپ، قايتادان سايلاۋ وتكىزۋدى تالاپ ەتتى. رەسمي مالىمەتپەن كەلىسپەگەن حالىق تا جاپپاي نارازىلىق اكتسياسىنا شىقتى، ال بيلىك ولاردى اياۋسىز باسۋمەن بولدى. بەلارۋستەگى «دەموكراتيا جولىنداعى كۇرەس» ءالى دە جالعاسىپ كەلەدى.

الەكساندر لۋكاشەنكو سايلاۋ ءادىل ءوتتى دەپ سانايدى. ال ەۋروپالىق وداق پەن اقش نارازىلىق شەرۋلەرىن قولداپ، بەلارۋس بيلىگىنىڭ بىرقاتار وكىلدەرىنە سانكتسيا ەنگىزۋ تۋرالى شەشىم شىعاردى. ال قازاقستان بيلىگى الەكساندر لۋكاشەنكونى العاشقىلاردىڭ ءبىرى بولىپ، سايلاۋداعى «جەڭىسىمەن» قۇتتىقتاعان.

ايتا كەتەيىك، سۆەتلانا تيحانوۆسكايا – تانىمال بلوگەر سەرگەي تيحانوۆسكيدىڭ ايەلى. بيلىك ونىڭ كۇيەۋىن ۇمىتكەر رەتىندە تىركەۋدەن باس تارتقان سوڭ تيحانوۆسكايا سايلاۋعا ءوزى قاتىسقان. سەرگەي تيحانوۆسكي قازىر قاماۋدا وتىر.

وتكەن اپتادا تيحانوۆسكايا 25 قازاندا «حالىقتىق ۋلتيماتۋم» جاريالاناتىنىن حابارلاپ، الەكساندر لۋكاشەنكونىڭ بيلىكتەن ءوز ەركىمەن كەتۋىن تالاپ ەتتى.

"The Qazaq Times"