يسلامسىز وزبەكستان قايدا بەت الدى؟

ءساۋىردىڭ 4-5-ءى ارالىعىندا شاۆحات ميرزياەۆ وزبەكستان پرەزيدەنتى رەتىندە رەسەيگە ءوزىنىڭ ەڭ العاشقى رەسمي ساپارىن جاسادى. رەسەي پرەزيدەنتى ۆلاديمير پۋتينمەن كەزدەسۋى بارىسىندا  ماسكەۋ مەن تاشكەنت اراسىندا جالپى قۇنى 16 ملرد دوللاردى قۇرايتىن كەلىسىم-شارتتارعا قول قويىلعان. كرەمل وزبەك ەلىنە 12 ملرد دوللار كولەمىندە ينۆەستيتسيا سالۋعا كەلىسكەن.

يسلام كارىموۆتىڭ تۇسىندا جابىق ەسىك رەجيمىن ۇستانعان وزبەك ەلىنىڭ جاڭا پرەزيدەنتىنىڭ بۇل ساپارىنا رەسەيلىك ساراپشىلار وڭ باعا بەرۋدە. وسىعان دەيىن وزبەكستاننىڭ جابىق ساياساتىن سىناپ كەلگەن كرەمل ساراپشىلارى نەگە وزگەرىپ سالا بەردى؟ ماسكەۋدىڭ  وزبەك پرەزيدەنتى شاۆحات ميرزياەۆقا قۇشاعىن ايقارا اشۋىنىڭ سىرى نەدە؟ بۇل ۆلاديمير پۋتين تاراپىنان جاسالىپ جاتقان «قايىرىمدىلىق اكتسياسى ما»؟ الدە وزبەك ەلىن كەدەندىك وداققا كىرگىزۋدىڭ العى شارتتارى ما؟

ەستەرىڭىزدە بولسا، قىرعىزستاندى وداققا كىرگىزەر الدىندا دا وسىعان ۇقساس قادامدار جاسالعان بولاتىن. استانا، بىشكەككە  كەدەندىك وداققا كىرۋگە كومەكتەسۋ ماقساتىندا 100 ملن دوللار كولەمىندە قارجى بەرگەن.  بىراق، وزبەكستان مەن قىرعىزستاندى سالىستىرۋعا كەلمەيتىنى انىق. رەسمي تاشكەنت، ەكونوميكالىق جاعىنان دا، گەوساياسي سالماعى جاعىنان دا قىرعىزستاننان ءباسى باسىم مەملەكەت. ال، وزبەك ەلى مەن رەسەيدىڭ جاقىنداسۋى اقورداعا ۇناماۋى مۇمكىن. ويتكەنى ورتالىق ازيادا قازاقستانعا باسەكەلەس بولا الاتىن بىردەن ءبىر ەل، ول – وزبەكستان. استانامەن قاتار تاشكەنتتىڭ كرەملمەن قارىم-قاتىناسىنىڭ جاقسارعانىن، اقش تا قولداماسى انىق. ۋاشينگتوننىڭ اۋعانستاندا ورنالاسقان اسكەري بازالارىنا، رەسەيدىڭ وزبەكستان ارقىلى جاقىنداۋى ولاردى دا ويلاندىرارى حاق.

نە دە بولسا، شاۆحات ميرزياەۆتىڭ ماسكەۋگە ساپارى يسلام كارىموۆتىڭ ۇستانعان ساياساتىن جالعاستىرمايتىنىن اڭعارتتى. وزبەك اعايىنداردىڭ الدا قانداي ساياسي قادامدارعا باراتىنىن ۋاقىت كورسەتەر. ال يسلام كارىموۆسىز وزبەكستاننىڭ، ش.ميرزياەۆ باسقارعان بيلىگى باسقاشاراق ەكەنىن بۇگىننەن دالەلدەپ جاتىر.

“The Qazaq Times”