قازاقستاندا ءبىر تاۋلىكتە 1348 ادام Covid-19 ۆيرۋسىن جۇقتىرعان. ونىڭ 456-سى سيمپتوممەن، 883-ءى سيمپتومسىز بولىپ تىركەلدى دەيدى رەسمي اقپارات كوزدەرى.

قازىر ەلدە جاعدايى اۋىر جانە اسا اۋىر ناۋقاستاردىڭ قاتارى ارتىپ كەلەدى. اسىرەسە، پنەۆومانيا دەرتىنە شالدىققان ناۋقاستاردىڭ جاعدايى مۇشكىل. ءبىر عانا الماتى قالاسىندا پنەۆمونيامەن اۋىراتىن 424 ادام گوسپيتالدا جاتىر. تاعى 980 ناۋقاستا پنەۆمونيامەن قوسا كوروناۆيرۋس ينفەكتسياسى دا انىقتالعان. وكپەنى جاساندى جەلدەتۋ اپپاراتىنا جاعدايى اۋىر 11 ناۋقاس قوسىلعان.

مۇنىمەن قوسا الماتى تۇرعىندارى پاندەميا كەزىندە قايتىس بولعان تۋىستارىنىڭ مايىتىنە قاتىستى قيىندىقتارعا تاپ بولعان. تۇرعىندار مايىتتەن ينفەكتسيا تابىلماسا دا، مارقۇمنىڭ جەرلەۋ ءراسىمى ءۇشىن كەدەرگى جيىلەپ كەتتى دەپ شاعىمدانادى. بۇعان قوسا، مورگتەر مەن ءدىني قىزمەت ۇيىمدارى قايتىس بولعان ادامدا ينفەكتسيا بولماعاندىعى تۋرالى انىقتاما بولسا عانا ءمايىتتى قابىلداۋعا دايىنبىز دەگەن.ال، مارقۇم ادامنىڭ تۋىستارى انىقتاما الىپ ۇلگەرگەنشە كۇننىڭ ىستىقتىعىنا بايلانىستى مايىتتەر يىستەنە باستاعان. وسىعان قاتىستى قالانىڭ باس سانيتار دارىگەرى جانداربەك بەكشين اۋرۋحانادان تىس جەردە قايتىس بولعان ادامداردى كوروناۆيرۋس تەستىنەن وتكىزبەيمىز دەپ مالىمدەدى.

مينيسترلىكتىڭ سوڭعى دەرەگى بويىنشا ەلدە ينفەكتسيانىڭ كلينيكالىق بەلگىسى بار 19 750 ادام تىركەلىپ، 140 ادام قايتىس بولعان. ال ەمدەلىپ شىققاندار سانى 12 220-عا جەتتى دەيدى بيلىك وكىلدەرى.

"The Qazaq Times"