ماۋسىمنىڭ باسىنان بەرى الماتى قالاسىنداعى ستاتسيونارلارعا كۆي جۇقتىرعان 2132 ناۋقاس تۇسكەن. بۇل تۋرالى الماتى قالاسىنداعى قوعامدىق دەنساۋلىق ساقتاۋ باسقارماسىنىڭ باسشىسى كامالجان نادىروۆ حابارلادى.

«وتكەن اپتادا عانا گوسپيتاليزاتسيالاۋ  مەن جەدەل جاردەم قىزمەتىنە جۇگىنۋ ەكى ەسەگە ۇلعايعان. ءبىز ينفەكتسيانى 20-29 جاس ارالىعىنداعى جاستار ءجيى جۇقتىراتىندىعىن بايقادىق. ولاردىڭ ۇلەسىنە سىرقاتتانۋشىلاردىڭ 35% تيەسىلى، 60 جاستان اسقان ازاماتتاردىڭ سانى ولاردان ءتورت ەسە از. ولار ينفەكتسيا جۇقتىرعانداردىڭ تەك 9% قۇرايدى»، – دەپ مالىمدەدى ول وكق برينفينگىندە.

قازىر ەلدە جاعدايى اۋىر جانە اسا اۋىر پاتسيەنتتەر سانى ارتقان. بۇل ولاردىڭ قانت ديابەتى، جۇرەك اۋرۋلارى جانە گيپەرتەنزيا سەكىلدى جاناما سىرقاتتارىنىڭ بولۋىنا بايلانىستى. مۇنداي قاتەرلەرگە كوبىنەسە جاسى ۇلعايعان ازاماتتار تاپ بولادى. جاعدايى اۋىر جانە اسا اۋىر پاتسيەنتتەردىڭ 80% 60 جاستان اسقان ادامدار.

ك.نادىروۆتىڭ ايتۋى بويىنشا قالاداعى ستاتسيونارلاردىڭ جۇكتەمەسى ارتىپ بارادى. كۇن سايىن 100-دەن اسا ناۋقاس گوسپيتاليزاتسيالانادى. قازىردىڭ وزىندە ستاتسيونارلاردىڭ 85%-ى بوس ەمەس. بيلىك وكىلدەرى قالاداعى بوس عيماراتتارعا ينسپەكتسيا جۇرگىزىپ، قوسىمشا ستاتسيونار اشۋ مۇمكىندىگىن قاراستىرىپ جاتىر دەپ ايتىلدى بريفينگتە.

ەسكە سالا كەتەيىك، قازاقستاندا توتەنشە جاعداي رەجيمى الىنعاننان كەيىن Covid-19 ۆيرۋسىن جۇقتىرعاندار سانى كۇرت كوبەيدى. ءىرى مەگاپوليستەردە كارانتين شارالارى جۇمسارتىلعانىنا 1 ايعا جۋىق ۋاقىت بولدى. ازىرگە جاعدايدىڭ وڭالا قويار ءتۇرى بايقالمايدى. ساۋىردە كوروناۆيرۋس ءوزىنىڭ شىرقاۋ شەگىنە جەتەدى دەگەن دەنساۋلىق ساقتاۋ ءمينيسترىنىڭ ءوزى جۋىردا ينفەكتسيا جۇقتىرىپ، ەم قابىلداۋعا ءماجبۇر بولعان.

قازىر قوعام ۆيرۋستىڭ بار ەكەندىگىنە  سەنەتىندەر مەن سەنبەيتىندەر بولىپ ەكىگە جارىلىپ وتىر. بيلىك وكىلدەرى قولدا بار قۇرالدارىمەن حالىقتى سەندىرىپ باعۋدا.

"The Qazaq Times"