تۇرىك پرەزيدەنتى ەردوعان مەن اقش مەملەكەت حاتشىسى تيللەرسون. فوتو: newsforberakfast

فرانتسيا اقپارات قۇرالدارى اقش جاڭا ۇكىمەتىنىڭ مەملەكەتتىك حاتشىسى تيللەرسون تۇركيادا رەسمي ساپاردا جۇرگەنىن حابارلاپ وتىر. 30 ناۋرىز تۇركيا استاناسى انكارادا تيللەرسون مەن تۇركيا سىرتقى ىستەر ءمينيسترى مەۆليۋت چاۆۋشوگلۋ كەزدەسىپ كەڭەيتىلگەن وتىرىس وتكىزگەن. كەزدەسۋدەن كەيىن بىرلىكتە جۋرناليستەردى قابىلداعان.

بۇل تيللەرسوننىڭ قىزمەتكە كىرىسكەننەن بەرى تۇركياعا جاساعان العاشقى ساپارى. وسىدان بۇرىن ترامپ ۇكىمەتىنىڭ نەگىزگى وكىلىنىڭ ءبىرى رەتىندە شىعىس ازيا ەلدەرىنە ديپلوماتيالىق ساپاردا بولىپ قايتقان ەدى. تيللەرسون اقش مەملەكەتتىك حاتشىسى رەتىندە تانىمال ساياسي تۇلعالاردىڭ بىرىنە اينالىپ كەلەدى. سەبەبى، ترامپ ۇكىمەتى ونى اقش-پەن ارادا وزەكتى ماسەلەلەر ورىن الىپ وتىرعان ەلدەرگە ديپلوماتيالىق ساپارلارعا ارت-ارتىنان اتتاندىرىپ وتىر. تيللەرسوننىڭ شىعىس ازياداعى ساپارى ءوڭىردىڭ قاۋىپسىزدىگىنىڭ ەڭ وزەكتى تۇسىندا بولدى. سونىمەن بىرگە شىعىس ازيا ەلدەرى مەن اقش اراسىنداعى جاڭا قارىم-قاتىناستىڭ العاشقى نەگىزىن قالادى دەپ باعالاۋعا بولادى.

وسى جولى تۇركياعا جاساعان ساپارى ەۋروپا ەلدەرى ءۇشىن نازار اۋداراتىن ماسەلەلەردىڭ ءبىرى. سەبەبى، تۇركياداعى رەفەرەندۋمعا بايلانىستى جانە سوڭعى كەزدەگى تۇرىك بيلىگىندەگى ساياسي قادامداردىڭ اسەرىنەن تۇركيا مەن ەو اراسىنداعى قارىم-قاتىناسقا ايتارلىقتاي سىزات تۇسكەن بولاتىن. اقش مەملەكەتتىك حاتشىسى تيللەرسون جۋرناليستەردى قابىلداۋ بارىسىندا تۇركيانىڭ تەرروريزمگە قارسى كۇرەس جۇرگىزۋدەگى تابىستى قادامدارىن القادى. اقش پەن تۇركيا لاڭكەستىككە بىرلەسىپ قارسى تۇرۋدىڭ جاڭا كەلىسىمدەرىنە كەلىپ، ءدىني ۇشقارى ۇيىمداردىڭ تارالۋىن ورتاق تەجەۋگە كەلىسىم جاساسقان.

“The Qazaq Times”