فوتو: https://ehonews.kz

قاڭتاردىڭ اياعىندا باستالعان شەتەلدىك كولىكتەردى تىركەۋ ماسەلەسىنەن تاعى دا جىك شىقتى. بۇل جولى ارمەنيانىڭ مەملەكەتتىك كىرىستەر كوميتەتى قازاقستاندىقتارعا ەسكەرتۋ جاسادى.

ەندى ارمەنياعا كولىگىن تىركەۋدەن شىعارۋعا بارعان ازاماتتار مۇلىك سالىعىن تولەۋى ءتيىس. ەگەر بيىل سالىق تولەمەسە، كەلەسى جىلى ولارعا ايىپپۇل سالىنباق. ارمەنيا تاراپىنان رەسمي وكىل: «مۇلىك سالىعىن تولەۋ ءۇشىن ونلاين-پلاتفورما قۇرۋ باستاماسى كوتەرىلدى. دەگەنمەن، بۇل جوبا جۇزەگە اسپاسا نەمەسە كەيىن ىسكە قوسىلسا دا مۇلىك سالىعىن تولەۋ مىندەتى ساقتالادى. ارمەنياعا كولىگىن تىركەۋدەن شىعارۋعا كەلگەن ازاماتتار بورىشىن وتەمەي مۇنى ىستەي المايدى. ەگەر بيىل سالىق تولەمەسە، كەلەسى جىلى ولارعا ايىپپۇل سالىنادى»، – دەپ حابارلادى.

بيىل قاڭتار ورتاسىندا ىشكى ىستەر مينيسترلىگى قازاقستان اۋماعىندا جۇرگەنىنە ءبىر جىل بولعان، بىراق ەسەپكە تۇرماعان كولىك يەلەرىنە ەسكەرتۋ جاساپ، زاڭدى تىركەۋگە قويۋعا شاقىرعان. وسىدان كەيىن اقتاۋ، اقتوبە، جاڭاوزەن، ورال، سەمەي، پەتروپاۆل قالالارىندا تىركەلمەگەن كولىك يەلەرى جينالىپ، نارازىلىق ءبىلدىردى. سەبەبى قازاقستانعا اكەلگەن كولىكتى تىركەۋ تىم قىمبات: تىركەۋ قۇنى كولىك باعاسىنان دا اسىپ جىعىلادى. ال رەسەي، ارمەنيا مەن قىرعىزستاننىڭ جالاۋى بار اۆتوكولىكتەر جول ءجۇرۋ ەرەجەسىن ءجيى بۇزاتىنىن ايتقان  بيلىك تىركەلمەگەن كولىكتەر جاۋاپكەرشىلىكتەن جالتارادى دەپ ەسەپتەيدى.

سوڭعى ءۇش جىلدا ەاەو ەلدەرىنەن 200 مىڭعا تارتا كولىك قازاقستانعا كىرگىزىلگەن. بىراق ولاردىڭ ءبارى تۇگەل تىركەلمەگەن. كوبى ترانزيتپەن كىرسە، ءبىرشاما بولىگى وسىندا جۇمىسقا كەلگەن ازاماتتارعا تيەسىلى بولىپ وتىر. تەك 40 مىڭى عانا زاڭدى تۇردە تىركەلگەن. رەسمي مالىمەتتەر بويىنشا، وتكەن جىلى ارمەنياعا شەتەلدەن 189 مىڭ اۆتوكولىك اكەلىنگەن. ولار ءۇشىن مەملەكەت قازىناسىنا 146 ميلليون دوللار مولشەرىندە كەدەندىك سالىق تولەنگەن.

"The Qazaq Times"