كورنەكى كوللاج. فوتو: الەۋمەتتىك جەلى

جامبىل وبلىسىنىڭ پوليتسيا دەپارتامەنتى قورداي اۋدانىنا قاراستى ماسانشى اۋىلىندا بولعان رەزونانس سيپاتىنداعى جانجال تۋرالى مالىمدەمە جاساپ، پرەزيدەنت توقاەۆ پىكىر ءبىلدىردى.

پوليتسيا دەپارتامەنتىنىڭ تەرگەۋ باسقارماسى تاراتقان حابارعا قاراعاندا، جاپپاي توبەلەسكە قاتىستى قىلمىستىق كودەكستىڭ 293-ءشى «بۇزاقىلىق» بابىمەن تەرگەۋ ءىسى باستالعان. ۆەدومستۆو مالىمەتىنشە، بۇگىن، اقپاننىڭ 7-ءسى قورداي اۋدانىنىڭ ماسانشى اۋىلىندا كوپشىلىك كولەمدە توبەلەس بولعان.

دەپارتامەنتتىڭ اقپاراتىنشا، 7 اقپاندا قورداي اۋدانى ماسانشى اۋىلىندا تۇرعىندار اراسىندا جانجال شىققان. ورگان توبەلەسكە نە تۇرتكى بولعانىن ايتپادى.

«پوليتسەيلەر جانجالدى توقتاتتى. جاعداي قازىر باقىلاۋدا» دەلىنگەن دەپارتامەنت مالىمدەمەسىندە. بۇگىنگى تاڭدا ءتارتىپ بۇزعاندار مەن بۇلىك سەبەپكەرلەرى انىقتالىپ جاتقانى ايتىلدى.

Whatsاpp جانە Instagram الەۋمەتتىك جەلىسىندە تاراعان ۆيدەوفراگمەنتتەردە بۇلىنگەن عيمارات، پوليتسيا كولىكتەرى، اۋدارىلعان كولىك پەن قولىنا قارۋ ۇستاعان توپتىڭ كورىنىسى بايقالادى، سونداي-اق تاپانشانىڭ داۋىسى ەستىلەدى.

قۇزىرلى ورگان حابارلامادا حالىقتى «جالعان اقپاراتقا سەنبەۋگە شاقىرىپ، فەيك دەرەك تاراتۋشىلار جاۋاپقا تارتىلىتىنىن» ەسكەرتتى.

ۆيدەودان پوليتسەي قىزمەتكەرىنە باعىنباي، قول كوتەرىپ قارسىلاسقان الدەبىر ازاماتتىڭ ارەكەتىن كورۋگە بولادى. كەيبىر اقپارات پورتالىندا بەيرەسمي دەرەك كوزدەرى بويىنشا، جۇما كۇنى كەشكىلىك ۋاقىتتا ماسانشى اۋىلىندا كەمى ءبىر تۇرعىن ءۇي ورتەنگەنى حابارلاندى. ءتىپتى قورداي اۋدانىنا وزگە اۋداننىڭ پوليتسيا قىزمەتكەرلەرى جۇمىلدىرىلىپ جاتقان كورىنەدى. الەۋمەتتىك جەلىدە تاراعان دەرەكتەرگە سۇيەنسەك، توپتىق توبەلەس ۇلتارالىق قاقتىعىسقا ۇلاسقان بولۋى مۇمكىن. جەرگىلىكتى حالىقتىڭ اراسىندا تۋعان جانجالدىڭ قاندايدا ءبىر ۇلتارازدىق سيپاتى بارى جونىندە رەسمي اقپارات بەرىلمەدى.

قورداي اۋدانىنداعى ورتەنگەن ءۇي دەلىنگەن ۆيدەودان سكرين-قيىندى. فوتو: الەۋمەتتىك جەلى

مەملەكەت باسشىسى توقاەۆ ءوز Twitter پاراعىندا اتالعان وقيعاعا بايلانىستى پىكىر ءبىلدىردى.

پرەزيدەنت «جامبىل وبلىسى قورداي اۋدانىندا بۇزاقىلىق سيپاتتاعى جاپپاي توبەلەس بولدى. ونى ارانداتۋشىلار ءوز پايداسىنا قولدانباق بولعان. پوليتسيا جاعدايدى رەتتەپ، ءوز باقىلاۋىنا الدى. قوعامدىق ءتارتىپتى بۇزعاندار جاۋاپكەرشىلىككە تارتىلادى»، – دەپ جازدى

“The Qazaq Times”