قازاقستان پرەزيدەنتى قاسىم-جومارت توقاەۆ پەن وزبەكستان باسشىسى شاۆكات ميرزيەەۆ. فوتو: tengrinews.kz

وزبەكستان بيلىگى پارلامەنت سايلاۋىنا دايىندالۋدا. بۇل جولعى سايلاۋدىڭ بۇرىنعى سايلاۋلاردان ەرەكشەلىگى قانداي؟

جەلتوقسان ايىندا وزبەكستاندا كەزەكتى پارلامەنت سايلاۋى وتەدى. وسىعان بايلانىستى جاقىندا پرەزيدەنت شاۆكات ميرزيەەۆ ەل اۋماعىندا تىركەلگەن بەس ساياسي پارتيا جەتەكشىلەرىن قابىلدادى. 24 تامىز كۇنى سەنات وتىرىسىندا ورتالىق سايلاۋ كوميسسياسىنىڭ جاڭا قۇرامى بەكىتىلدى. بۇل جولعى سايلاۋ شاۆكات ميرزيەەۆ بيلىك باسىنا كەلگەلى بەرى وتكەلى وتىرعان العاشقى پارلامەنت سايلاۋى. بىراق قازىردىڭ وزىندە بۇل سايلاۋدىڭ يسلام كارىموۆ كەزىندەگى سايلاۋلاردان ەشقانداي ايىرماشىلىعى جوق بولاتىندىعى بايقالادى.

«بيردامليك» وپپوزيتسيالىق پارتياسىنىڭ كوشباسشىسى باحودىر چوريەۆ «بۇل جولعى سايلاۋ  شاۆكات ميرزيەەۆتىڭ ءۇش جىلدا جاساعان رەفورمالارىنىڭ بارلىعى جالعان ەكەنىن كورسەتتى» دەپ ەسەپتەيدى. ونىڭ سوزىنشە، سوڭعى ءۇش جىلدا ميرزيەەۆ بيلىكتەگى پوزيتسياسىن كۇشەيتۋ ارقىلى ەلدىڭ باعىتىن انىقتاپ، ەشقانداي ساياسي رەفورما بولمايتىن ايقىنداعان.

«ميرزيەەۆ رەفورماتور ەمەس، كارىموۆتىڭ جولىن جالعاستىرۋشى. وزبەكستاندا تمد ەلدەرىنىڭ ىشىندە ساياسي پارتيالاردى تىركەۋدىڭ ەڭ اۋىر جۇيەسى قالىپتاسقان. ساياسي پارتيا قۇرۋ ءۇشىن كەم دەگەندە 8 ايماقتان 20 مىڭ ادامنىڭ قولىن جيناۋعا ءتيىسسىڭ. حالىق سانى وزبەكستاننان بەس ەسە كوپ رەسەيدە پارتيا قۇرۋ ءۇشىن 10 مىڭ قول، تۇركىمەنستان مەن بەلارۋستە 1 مىڭ قول، قىرعىزستاندا 10 ادامنىڭ قولى بولسا جەتكىلىكتى. بۇعان قوسا سايلاۋعا حالىق اتىنان ۇسىنىلعان كانديداتتار قاتىسا المايدى. پارلامەنتكە بارۋدىڭ جالعىز جولى – پارتيالار اتىنان سايلاۋعا ءتۇسۋ» - دەدى چوريەۆ.

ايتا كەتەتىن ءبىر جايت، سوڭعى ۋاقىتتارى قازاقستاندا دا «بيىل كەزەكتەن تىس پارلامەنت سايلاۋى ءوتۋى مۇمكىن» دەگەن قاڭقۋ ءسوز ەل اراسىندا «جەلدەي ەسىپ» ءجۇر. نەگىزىندە قازاقستان مەن وزبەكستانداعى سايلاۋ جۇيەسىنىڭ ءبىر-بىرىنەن ەشقانداي ايىرماشىلىعى جوق. تەك حالىق سانى بىزدەن ەكى ەسە  كوپ وزبەك ەلىندە پارتيا قۇرۋ ءۇشىن 20 مىڭ قول كەرەك بولسا، بىزدە 40 مىڭ قول جيناۋ كەرەك.

"The Qazaq Times"