فەدەراتسيا كەڭەسى توراعاسىنىڭ حالىقارالىق ىستەر بويىنشا ورىنباسارى ءارى رەسەي ەگەمەندىگىن قورعاۋ بويىنشا كوميسسيا مۇشەسى اندرەي كليموۆ ماسكەۋدە ءوتىپ جاتقان قارسىلىق اكتسيالارىنا باتىس ەلدەرى ارالاسىپ وتىر دەپ مالىمدەدى.

ونىڭ سوزىنشە، بۇل ىستە ەڭ ءبىرىنشى اقش "ويناپ" وتىر. كليموۆ 10 تامىزدا اكادەميك ساحاروۆ داڭعىلىندا وتكەن ميتينگكە "وزگە ەلگە قىزمەت ەتەمىن دەپ انت بەرگەن" "ەكى ازاماتتىعى بار" ادامدار قاتىستى دەپ مالىمدەدى.

كليموۆ مىسال رەتىندە رەپەر Oxxxymiron-دى اتاپ، "34 جىل ءومىرىنىڭ كوپ بولىگىن باتىس ەۋروپادا، ۇلىبريتانيادا وتكىزدى، ەندى كەلىپ ماسكەۋ قالالىق دۋماسىنا دەپۋتات بولعىسى كەلەدى" دەدى.

ول رەپەردەن بولەك اكتسياعا قاتىسۋشىلارعا قۇقىقتىق كەڭەس بەرۋشىنىڭ دە اقش ازاماتى ەكەنىن ايتتى.

الايدا فەدەراتسيا كەڭەسى مۇشەلەرىنىڭ باسىم كوپشىلىگىنىڭ شەتەلدە جىلجىمايتىن مۇلىكتەرى بار. اتاپ ايتقاندا جوعارعى پالاتانىڭ تامبوۆ وبلىسى بويىنشا وكىلى الەكساندر باباكوۆتىڭ پاريجدە قۇنى 16 ميلليون دوللار تۇراتىن پاتەرى بار. ال ينتەرنەتتە بيلىكتى بالاعاتتاعانى ءۇشىن جازاعا تارتۋ زاڭىنىڭ اۆتورى اندرەي كليشاستىڭ شۆەيتساريادا ءزاۋلىم ءۇيى بار.

كەڭەستىڭ تۋلسك وبلىسى بويىنشا وكىلى دميتري ساۆەلەۆ ۇلىبريتانديادان 500 شارشى مەترلىك ءۇي ساتىپ العان. فەدەراتسيا كەڭەسىنىڭ وزگە مۇشەلەرى ليۋبوۆ گلەبوۆانىڭ گەرمانيادا، ۆيتالي بوگدانوۆتىڭ يتاليادا ءزاۋلىم سارايلارى بار.

"كرەمليوۆسكي بەزباشەننيك" تەلەگرام-كانالىنىڭ مالىمەتى بويىنشا، فەدەراتسيا كەڭەسىنىڭ كەمىندە جەتى مۇشەسىندە شەتەل ازاماتتىعى بار. ​

وسىنىڭ الدىندا ماسكەۋ مەرى سەرگەي سوبيانين «نارازىلىق شاراسىنا قاتىسۋشىلاردىڭ دەنى ماسكەۋلىكتەر ەمەس» - دەپ مالىمدەگەن.

الەۋمەتتىك زەرتتەۋلەرگە سايكەس، وتكەن سەنبىدە ساحاروۆ داڭعىلىندا وتكەن ميتينگىگە قاتىسۋشىلاردىڭ 80 پايىزى ماسكەۋلىكتەر، قالعان 17 پايىزى ماسكەۋ وبلىسىنىڭ تۇرعىندارى.

ماسكەۋ قالالىق دۋما سايلاۋىنا تاۋەلسىز ۇمىتكەرلەردى وتكىزۋدى تالاپ ەتىپ جاتقان وپپوزيتسيانىڭ اكتسياسى ءبىر ايدان بەرى جالعاسىپ جاتىر. ​وسى ۋاقىت ارالىعىندا پوليتسيا ءۇش مىڭنان استام ادامدى ۇستادى.

"The Qazaq Times"